शेतीच्या वादातून दोन गटात तुंबळ हाणामारी; जीपने चिरडण्याचा प्रयत्न, एकाची प्रकृती गंभीर
कन्नड तालुका (प्रतिनिधी )
शेत जमिनीच्या जुन्या वादातून चुलत्या-पुतण्यामध्ये झालेल्या भीषण वादाचे रूपांतर थेट जीवघेण्या हल्ल्यात झाल्याची धक्कादायक घटना समोर आली आहे. गट क्रमांक ७८ मध्ये झालेल्या या वादात आरोपी चुलता जगन्नाथ थोरात यांनी पुतण्या योगेश कानिफनाथ थोरात (वय ३५ वर्ष) यांच्या अंगावर थेट जीप घालून त्यांना गंभीर जखमी केले आहे.
मिळालेल्या प्राथमिक माहितीनुसार, तालुक्यातील देवगाव रंगारी परिसरातील गट नंबर ७८ च्या जमिनीवरून थोरात कुटुंबात गेल्या काही दिवसांपासून वाद सुरू होता. आज याच वादाने अत्यंत हिंसक वळण घेतले. दोन्ही बाजूंनी वाद वाढत गेल्यानंतर चुलता जगन्नाथ थोरात आणि पुतण्या योगेश थोरात यांच्यात जोरदार हाणामारी झाली.
वाद एवढ्यावरच थांबला नाही, तर रागाच्या भरात आरोपी जगन्नाथ थोरात यांनी आपल्या ताब्यातील जीप वेगाने चालवून पुतण्या योगेश थोरात यांना जोराची धडक दिली आणि त्यांना चिरडण्याचा प्रयत्न केला.
या भीषण अपघातात ३५ वर्षीय योगेश थोरात हे गंभीर जखमी झाले असून, त्यांना तात्काळ उपचारासाठी जवळच्या रुग्णालयात दाखल करण्यात आले आहे.व त्यांचा मृत्यू झाल्याचे समजते. घटनेची माहिती मिळताच स्थानिक पोलिसांनी घटनास्थळी धाव घेतली असून, पुढील तपास सुरू केला आहे. या घटनेमुळे परिसरात खळबळ उडाली असून शेतीच्या वादातून थेट जीवाने मारण्याचा प्रयत्न झाल्याने परिसरात तीव्र संताप व्यक्त होत आहे.
