पिंपरी-चिंचवड : वारकरी संप्रदायातील सेवाभावी कार्य, समाजप्रबोधन आणि अध्यात्मिक क्षेत्रातील उल्लेखनीय योगदानामुळे ह.भ.प. मारुती महाराज शेजाळ यांची पिंपरी-चिंचवड शहर अखिल वारकरी सेवा संघाच्या अध्यक्षपदी निवड करण्यात आली आहे. त्यांच्या निवडीमुळे वारकरी संप्रदायामध्ये आनंदाचे वातावरण निर्माण झाले असून विविध स्तरांतून त्यांच्यावर अभिनंदनाचा वर्षाव होत आहे.
मारुती महाराज शेजाळ हे वारकरी परंपरेचे निष्ठावंत सेवक म्हणून ओळखले जातात. अखंड हरिनामाचा गजर, समाजात एकता, सेवा आणि संस्कारांची जपणूक यासाठी ते सातत्याने कार्यरत आहेत. त्यांच्या नेतृत्वाखाली वारकरी सेवा संघाचे कार्य अधिक व्यापक आणि प्रभावी होईल, असा विश्वास वारकरी बांधवांनी व्यक्त केला आहे.
अध्यक्षपदी निवड झाल्यानंतर वारकरी बांधवांमध्ये उत्साहाचे वातावरण निर्माण झाले आहे. वारकरी संप्रदायातील भक्ती, सेवा आणि सामाजिक बांधिलकीचा संदेश अधिक प्रभावीपणे जनसामान्यांपर्यंत पोहोचविण्यासाठी ते प्रयत्नशील राहतील, अशी अपेक्षा व्यक्त केली जात आहे.
मारुती महाराज शेजाळ यांच्या या निवडीबद्दल वारकरी, सामाजिक, धार्मिक तसेच विविध क्षेत्रातील मान्यवरांनी त्यांचे अभिनंदन करून पुढील वाटचालीस शुभेच्छा दिल्या आहेत. त्यांच्या नेतृत्वामुळे पिंपरी-चिंचवड शहरातील वारकरी चळवळीला नवी ऊर्जा व दिशा मिळेल, असा विश्वास व्यक्त होत आहे.
