वर्धा | प्रतिनिधी :
वर्धा जिल्ह्यातील सावंगी मेघे पोलीस स्टेशनच्या पथकाने मोठी कारवाई करत दहेगाव स्टेशन शिवारातून संशयास्पदरीत्या साठवून ठेवलेले तब्बल २,७३० लिटर डिझेल व पेट्रोल जप्त केले आहे. या कारवाईत २ लाख ८५ हजार ७५९ रुपयांचा मुद्देमाल हस्तगत करण्यात आला असून अज्ञात आरोपीविरुद्ध गुन्हा दाखल करण्याची प्रक्रिया सुरू आहे.
पोलिसांना दि. ३० मे २०२६ रोजी मौजा दहेगाव स्टेशन शिवारात काही व्यक्तींची संशयास्पद हालचाल सुरू असल्याची गोपनीय माहिती प्राप्त झाली होती. या माहितीची गंभीर दखल घेत सावंगी मेघे पोलीस स्टेशनचे पथक तात्काळ घटनास्थळी रवाना झाले. यावेळी जिल्हा पुरवठा विभागाच्या अधिकाऱ्यांनाही सोबत घेण्यात आले.
घटनास्थळी पोहोचल्यानंतर पोलिसांनी परिसराची तपासणी केली असता काळ्या व निळ्या रंगाच्या प्लास्टिक कॅनमध्ये मोठ्या प्रमाणावर इंधन साठवून ठेवण्यात आल्याचे आढळून आले. तपासणीदरम्यान ५४ प्लास्टिक कॅनमध्ये अंदाजे १,६२० लिटर डिझेल आणि ३७ प्लास्टिक कॅनमध्ये अंदाजे १,११० लिटर पेट्रोल आढळले. अशाप्रकारे एकूण २,७३० लिटर इंधन जप्त करण्यात आले.
पोलिसांनी पंचनामा करून संपूर्ण मुद्देमाल ताब्यात घेतला. जप्त करण्यात आलेल्या डिझेल व पेट्रोलची अंदाजे किंमत २,८५,७५९ रुपये असल्याचे सांगण्यात आले आहे. या प्रकरणी अज्ञात आरोपींविरुद्ध सावंगी मेघे पोलीस ठाण्यात गुन्हा नोंदविण्याची कार्यवाही सुरू आहे. इंधनाचा साठा कोणत्या उद्देशाने करण्यात आला होता, त्यामागे कोणाचा सहभाग आहे याचा तपास पोलीस करत आहेत.
ही कारवाई सौरभकुमार अग्रवाल, सदाशिव वाघमारे आणि प्रमोद मकेश्वर यांच्या मार्गदर्शनाखाली करण्यात आली.
कारवाईमध्ये सहाय्यक पोलीस निरीक्षक पंकज वाघोडे, पोलीस उपनिरीक्षक सतीश दुधाने, सहाय्यक फौजदार शरद मुन, पोलीस हेड कॉन्स्टेबल नितीन भगत, संजय पंचभाई, चालक पोलीस अंमलदार आकाश गोरे, सुमित राठोड तसेच चालक महिला पोलीस अंमलदार अंजली गडेकर यांनी सहभाग घेतला.
सांवगी मेघे पोलिसांच्या या कारवाईमुळे अवैध इंधन साठवणूक व काळाबाजार करणाऱ्यांमध्ये खळबळ उडाली असून, अशा बेकायदेशीर प्रकारांविरुद्ध पुढेही कठोर कारवाई सुरू राहणार असल्याचे पोलीस प्रशासनाने स्पष्ट केले आहे.
