खोडलधाम दशाब्दी महोत्सव निमंत्रण रथयात्रेचे निजर तालुक्यात भव्य स्वागत.

शहादा,दि.30(का.प्र.)
खोडलधाम (कागवड) येथे आगामी 19 ते 21 जानेवारी 2027 दरम्यान आयोजित करण्यात आलेल्या दशाब्दी महोत्सवाच्या निमित्ताने संपूर्ण गुजरातमध्ये ‘निमंत्रण रथयात्रा’ काढण्यात येत आहे. या रथयात्रेचे नुकतेच सीमावर्ती भागातील निजर तालुक्यात अत्यंत उत्साहपूर्ण आणि भक्तीमय वातावरणात भव्य स्वागत करण्यात आले.
ही रथयात्रा गुजरात राज्यातील व्यावल, पिपलोड, सरवाळा, चिचोडा, वांका, निजर, मुबारकपूर आणि वेल्दा या गावांमध्ये पोहचली असता, ठिकठिकाणी ग्रामस्थांनी आणि भाविकांनी माता खोडल यांची आरती करून भावपूर्ण स्वागत केले. या प्रसंगी उपस्थित समाजबांधवांना दशाब्दी महोत्सवाचे महत्त्व पटवून देत, महोत्सवात मोठ्या संख्येने सहभागी होण्याचे आवाहन करण्यात आले.

या रथयात्रेच्या यशस्वी आयोजनासाठी तापी जिल्ह्याचे कन्व्हिनर धीरजभाई पटेल, जितेंद्रभाई पटेल, प्रेमध्यालभाई पटेल तसेच निजर तालुक्याचे सह-कन्व्हिनर योगेशभाई पटेल, मयूरभाई पटेल, राजेशभाई पटेल आणि इतर कार्यकर्त्यांनी गावोगावी जाऊन विशेष परिश्रम घेतले.
तसेच, अखिल भारतीय गुर्जर (पाटीदार) महासभेचे राष्ट्रीय महामंत्री तथा नर्मदेश्वर महादेव मंदिर समितीचे अध्यक्ष जगदीशभाई पटेल यांनीही या रथयात्रेच्या नियोजनासाठी मोलाचे मार्गदर्शन केले. निजर येथे झालेल्या भव्य स्वागतादरम्यान मोठ्या संख्येने नागरिकांनी दर्शनाचा लाभ घेत दशाब्दी महोत्सवाचे निमंत्रण स्वीकारले. तापी जिल्ह्यात ही रथयात्रा पाठवल्याबद्दल सर्व कन्व्हिनरांनी खोडलधाम ट्रस्टचे विशेष आभार मानले.