शहादा,दि.३०(का.प्र.)
शहादा नगरपालिकेमार्फत शहरातील वाढीव पाणीपुरवठा योजनेअंतर्गत सुरू असलेल्या पाइपलाइन आणि नवीन पाण्याच्या टाकीच्या बांधकामाची उपनगराध्यक्षा सौ.माधवीताई मकरंद पाटील यांनी प्रत्यक्ष भेट देऊन पाहणी केली.
वृंदावन नगर परिसरातील नागरिकांनी या कामाबाबत काही समस्या व तक्रारी मांडल्या होत्या. नागरिकांच्या अडचणी जाणून घेऊन त्यांचे तत्काळ व समाधानकारक निराकरण व्हावे, यासाठी या दौऱ्याचे आयोजन करण्यात आले होते.
यावेळी प्रभागाचे नगरसेवक ललितभाई रमणलाल छाजेड, नगरसेवक हरीशभाई पाटील यांच्यासह संबंधित ठेकेदार, पाणीपुरवठा विभागाचे अधिकारी, कर्मचारी व परिसरातील नागरिक मोठ्या संख्येने उपस्थित होते.वृंदावन नगर परिसरातील नागरिकांनी मांडलेल्या विविध प्रश्नांवर आणि सूचनांवर यावेळी सविस्तर चर्चा करण्यात आली. उपनगराध्यक्षा सौ.माधवीताई पाटील आणि नगरसेवकांनी संबंधित ठेकेदार व कर्मचाऱ्यांशी चर्चा करून कामाच्या प्रगतीचा आढावा घेतला. तसेच नागरिकांना भविष्यात कोणतीही अडचण निर्माण होऊ नये, यासाठी काम अत्यंत दर्जेदार आणि ठरवून दिलेल्या वेळेत पूर्ण करण्याबाबत अधिकाऱ्यांना व ठेकेदाराला आवश्यक सूचना दिल्या.
“जनतेच्या समस्या सोडविण्यासाठी लोकप्रतिनिधी सदैव तत्पर असून नागरिकांच्या हिताला आमचे सर्वोच्च प्राधान्य आहे. शहादा शहरातील नागरिकांना भविष्यात सुरळीत व मुबलक पाणीपुरवठा उपलब्ध करून देणे हेच आमचे उद्दिष्ट आहे, अशी प्रतिक्रिया माधवीताई मकरंद पाटील (उपनगराध्यक्षा, शहादा) यांनी दिली असून शहराच्या पाणीपुरवठा व्यवस्थेला अधिक सक्षम व बळकट करण्याच्या दृष्टीने हे वाढीव पाणीपुरवठा योजनेचे काम अत्यंत महत्त्वाचे आहे. नागरिकांना भविष्यात अधिक चांगल्या आणि मूलभूत सुविधा उपलब्ध करून देण्यासाठी नगरपालिकेमार्फत सातत्याने प्रयत्न करण्यात येत आहेत. या पाहणी दौऱ्यादरम्यान, योजनेचे काम दर्जेदार व वेळेत पूर्ण व्हावे यासाठी उपस्थित सर्वच संबंधित अधिकारी आणि ठेकेदारांनी सकारात्मक भूमिका घेत आवश्यक उपाययोजना करण्याचे आश्वासन दिले.
