आंबेगाव (विशेष प्रतिनिधी): आंबेगाव तालुक्यातील आमोंडी गावची सुकन्या कुमारी सोनल राजाराम काथेर हिने शैक्षणिक क्षेत्रात उल्लेखनीय यश संपादन करत तालुक्याचा नावलौकिक वाढविला आहे. सोनलने भारतातील अग्रगण्य शैक्षणिक संस्था Indian Institute of Science Education and Research Pune (आयसर पुणे) येथून BS-MS (Dual Degree) हा मानाचा आणि अत्यंत आव्हानात्मक अभ्यासक्रम यशस्वीरीत्या पूर्ण केला आहे. आयसरमधून शिक्षण पूर्ण करणारी ती आंबेगाव तालुक्यातील पहिली सुकन्या ठरली आहे.
सोनलच्या यशाची आणखी एक अभिमानास्पद बाब म्हणजे तिला पुढील उच्च शिक्षणासाठी RWTH Aachen University या जर्मनीतील जागतिक दर्जाच्या विद्यापीठात एम.एस. (M.S.) शिक्षणासाठी प्रवेशाची संधी मिळाली आहे. भविष्यात एक यशस्वी शास्त्रज्ञ म्हणून कार्य करण्याचे तिचे ध्येय असून, तिच्या या यशामुळे आमोंडी गावासह संपूर्ण आंबेगाव तालुक्याचे नाव राष्ट्रीय आणि आंतरराष्ट्रीय स्तरावर पोहोचले आहे..
भव्य दीक्षांत समारंभात पदवी प्रदान
पुणे येथे आयसर संस्थेत आयोजित करण्यात आलेल्या दिमाखदार पदवीप्रदान समारंभात सोनलला BS-MS पदवी प्रदान करण्यात आली. या सोहळ्यास देश-विदेशातील नामवंत शास्त्रज्ञ, शिक्षणतज्ज्ञ आणि मान्यवर उपस्थित होते.
प्रमुख मान्यवरांची उपस्थिती
- Sanjay Kirloskar – सुप्रसिद्ध उद्योजक व अध्यक्ष, किर्लोस्कर ब्रदर्स लिमिटेड
- M. Madan Gopal – अध्यक्ष, शासक मंडळ (आयसर)
- Sunil Bhagwat – संचालक, आयसर पुणे
या मान्यवरांच्या हस्ते सोनलला सन्मानपूर्वक पदवी प्रदान करण्यात आली.
ग्रामीण भागातून प्रेरणादायी यश
सर्वसामान्य कुटुंबातील आणि ग्रामीण पार्श्वभूमीतून आलेल्या सोनलने आपल्या जिद्द, मेहनत आणि गुणवत्तेच्या बळावर हे यश मिळविले आहे. विज्ञान क्षेत्रात संशोधन करून देशाच्या प्रगतीसाठी योगदान देण्याचे तिचे स्वप्न आहे.
सोनल काथेरच्या या यशाबद्दल आमोंडी गावातील ग्रामस्थ, शिक्षक, विद्यार्थी, सामाजिक संस्था तसेच आंबेगाव तालुक्यातील नागरिकांकडून तिच्यावर अभिनंदनाचा वर्षाव होत असून, तिचे यश ग्रामीण भागातील विद्यार्थ्यांसाठी प्रेरणादायी ठरत आहे.
