कु. आम्रपाली खंडारे यांना न्यूयॉर्क विद्यापीठाची ‘मास्टर्स इन मेकॅट्रॉनिक्स अँड रोबोटिक्स’ पदवी
गोंडपिंपरी | प्रतिनिधी
गडचिरोली जिल्ह्यातील रामनगर येथील रहिवासी तथा नागपूर शहर पोलीस दलातील सहाय्यक पोलीस निरीक्षक आनंदकुमार तुळशीराम खंडारे यांची कन्या कु. आम्रपाली आनंदकुमार खंडारे हिने अमेरिकेतील प्रतिष्ठित New York University मधून “मास्टर्स इन मेकॅट्रॉनिक्स अँड रोबोटिक्स प्रोग्राम” यशस्वीरित्या पूर्ण करून गडचिरोली जिल्ह्याचे नाव आंतरराष्ट्रीय स्तरावर उज्ज्वल केले आहे.
आम्रपालीचे प्राथमिक शिक्षण गडचिरोली येथील कार्मेल हायस्कूलमध्ये झाले. नर्सरी ते दहावीपर्यंतच्या शिक्षणादरम्यान तिने उत्कृष्ट शैक्षणिक कामगिरी केली. सन 2015 मध्ये सीबीएसई दहावीच्या परीक्षेत तिने 93.01 टक्के गुण मिळविले. त्यानंतर अकरावी-बारावीचे शिक्षण नागपूर येथील सेंट पॉल ज्युनियर सायन्स कॉलेजमध्ये पूर्ण करत सन 2017 मध्ये बारावीच्या परीक्षेत 88 टक्के गुण संपादन केले.
पुढे जिद्द, चिकाटी आणि कठोर परिश्रमाच्या बळावर तिने जेईई परीक्षेत उल्लेखनीय यश मिळवत नागपूर येथील Visvesvaraya National Institute of Technology मध्ये प्रवेश मिळवला. तेथे तिने इलेक्ट्रिकल अँड इलेक्ट्रॉनिक्स इंजिनिअरिंग शाखेत बी.टेक. पदवी संपादन केली. शिक्षणादरम्यान तिने रोबोटिक्स तंत्रज्ञानाशी संबंधित विविध प्रकल्पांमध्ये सहभाग घेत प्रशिक्षणही प्राप्त केले.
बी.टेक. पूर्ण झाल्यानंतर बेंगळुरूमधील एका रोबोटिक्स तंत्रज्ञान कंपनीत कार्यरत असतानाच तिने उच्च शिक्षणाचे स्वप्न जपले. परदेशातील शिक्षणासाठी आवश्यक असलेल्या GRE आणि TOEFL परीक्षांची तयारी करत तिने 340 पैकी 310 गुण मिळवून उल्लेखनीय यश संपादन केले. या गुणवत्तेच्या जोरावर तिची अमेरिकेतील न्यूयॉर्क विद्यापीठात निवड झाली.
सन 2024 ते 2026 या कालावधीत तिने अमेरिकेत अत्यंत संघर्षमय परिस्थितीत शिक्षण पूर्ण केले. अखेर 18 मे 2026 रोजी झालेल्या दीक्षांत समारंभात तिला “मास्टर्स इन मेकॅट्रॉनिक्स अँड रोबोटिक्स” ही पदव्युत्तर पदवी प्रदान करण्यात आली.
आपल्या यशाचे श्रेय आम्रपालीने आपल्या आई-वडिलांना, शिक्षकांना आणि कुटुंबीयांना दिले आहे. तिच्या या उल्लेखनीय यशाबद्दल गडचिरोली जिल्ह्यासह विविध स्तरांतून तिचे अभिनंदन होत असून, ग्रामीण भागातील विद्यार्थ्यांसाठी ती प्रेरणास्थान ठरत आहे.
जिद्द, मेहनत आणि सातत्यपूर्ण प्रयत्नांच्या जोरावर गडचिरोलीच्या कन्येने अमेरिकेत यशाचा झेंडा रोवला असून तिच्या या यशाने जिल्ह्याच्या शिरपेचात मानाचा तुरा खोवला आहे. 🎓🇮🇳🇺🇸💐
