निमोण (ता. चांदवड) | प्रतिनिधी
चांदवड तालुक्यातील निमोण गावासाठी अभिमानाची बाब ठरलेल्या घटनेत गावातील सोरभ उगले आणि विशाल माळी या दोन युवकांची भारतीय सैन्यात निवड झाली आहे. दोघेही लवकरच प्रशिक्षणासाठी रवाना होणार असून त्यांच्या निवडीमुळे संपूर्ण गावात आनंदाचे वातावरण निर्माण झाले आहे.
सोरभ उगले यांचे वडील संजय उगले हे शेतकरी आहेत, तर विशाल माळी यांचे वडील राजेंद्र माळी हे मोलमजुरी करून कुटुंबाचा उदरनिर्वाह करतात. आर्थिक परिस्थिती साधी असतानाही मुलांच्या शिक्षणासाठी आणि स्वप्नपूर्तीसाठी त्यांनी अथक परिश्रम घेतले. त्यांच्या त्याग आणि मेहनतीचे फळ आज मुलांच्या यशातून दिसून आले आहे.
मुलांच्या निवडीबद्दल भावना व्यक्त करताना राजेंद्र माळी म्हणाले, “दिवसभर मोलमजुरी करायची, पण मुलगा सैन्यात गेला हीच माझी खरी कमाई आहे.” तर संजय उगले यांनी “शेतकऱ्याचा मुलगा जवान झाला, यापेक्षा मोठा अभिमान दुसरा कोणता?” अशा शब्दांत आनंद व्यक्त केला.
दोघांच्या निवडीची बातमी गावात पोहोचताच निमोणमध्ये जल्लोषाचे वातावरण निर्माण झाले. गावकऱ्यांनी फटाके फोडून, गुलाल उधळून आनंद साजरा केला. युवा मित्र परिवारासह ग्रामस्थांनी सोरभ उगले, विशाल माळी तसेच त्यांच्या कुटुंबियांचे अभिनंदन केले.
यावेळी गावकऱ्यांनी “कष्टकरी कुटुंबातील मुलांनी देशसेवेची वाट निवडून गावाचे आणि तालुक्याचे नाव उज्ज्वल केले आहे,” अशी भावना व्यक्त केली.
दरम्यान, सोरभ उगले आणि विशाल माळी यांनी “जय हिंद! वडिलांच्या कष्टाचे आणि निमोणच्या मातीचे ऋण आम्ही देशसेवेतून फेडू,” असा निर्धार व्यक्त केला.
त्यांच्या या यशामुळे निमोण गावासह संपूर्ण चांदवड तालुक्यातून त्यांच्यावर शुभेच्छांचा वर्षाव होत आहे.
