पनवेल | प्रतिनिधी
पनवेल महानगरपालिका हद्दीतील काही स्मशानभूमींमध्ये अंत्यसंस्कारासाठी येणाऱ्या नागरिकांची आर्थिक लूट होत असल्याचे गंभीर आरोप समोर आले आहेत. यासंदर्भात एका जागरूक नागरिकाने माध्यमांमार्फत प्रशासनाचे लक्ष वेधत तात्काळ चौकशी करून दोषींवर कारवाई करण्याची मागणी केली आहे.
तक्रारीनुसार, स्मशानभूमीतील लाकूड पुरवठ्याच्या कंत्राटामध्ये नातेवाईकशाही असून कंत्राटदार, कामगार आणि काही जबाबदार कर्मचारी यांच्यात संगनमत असल्याचा आरोप करण्यात आला आहे. तसेच अग्निदहन यंत्रणा उपलब्ध असूनही ती बंद असल्याचे सांगून नागरिकांना लाकूड वापरण्यास भाग पाडले जात असल्याचा दावा करण्यात आला आहे.
नागरिकांच्या म्हणण्यानुसार, अंत्यसंस्कारासाठी लाकूड, डिझेल आणि इतर खर्चाच्या नावाखाली मोठ्या प्रमाणात रक्कम आकारली जात असून दुःखद प्रसंगात असलेल्या कुटुंबांकडून सक्तीने पैसे घेतले जात असल्याचा आरोप आहे. शेजारील काही महानगरपालिका क्षेत्रांमध्ये अशा सुविधा मोफत उपलब्ध असताना पनवेल परिसरात नागरिकांना अतिरिक्त खर्च करावा लागत असल्याची नाराजी व्यक्त करण्यात आली आहे.
याशिवाय, अंत्यसंस्कारासाठी आणलेल्या तूप, खोबरे आणि कापूर यांसारख्या साहित्याचा गैरवापर होत असल्याचा तसेच काही ठिकाणी पर्यावरणीय नियमांचे उल्लंघन केल्याचे आरोपही करण्यात आले आहेत. स्मशानभूमी परिसरात सीसीटीव्ही यंत्रणा नसल्याने पारदर्शकतेचा अभाव असल्याची तक्रारही नागरिकांनी केली आहे.
तक्रारदाराने संबंधित कर्मचाऱ्यांची बदली, जबाबदार अधिकाऱ्यांवर चौकशी, सुपरवायझरवर कारवाई आणि संपूर्ण व्यवस्थेचे पारदर्शक पद्धतीने पुनर्गठन करण्याची मागणी केली आहे.
दरम्यान, या सर्व आरोपांबाबत पनवेल महानगरपालिका प्रशासन, संबंधित अधिकारी किंवा कंत्राटदार यांची अधिकृत भूमिका अद्याप समोर आलेली नाही. त्यामुळे या आरोपांची सत्यता अधिकृत चौकशीनंतरच स्पष्ट होणार आहे. नागरिकांनी प्रशासनाकडे निष्पक्ष चौकशी करून सत्य परिस्थिती जनतेसमोर आणण्याची मागणी केली आहे.
