मारेगाव | प्रतिनिधी : प्रणय खैरे
मारेगाव पोलीस ठाण्याच्या हद्दीतील विविध गुन्ह्यांमध्ये आरोपी असलेल्या आणि न्यायालयात हजर राहण्याबाबत वारंवार समन्स बजावूनही गैरहजर राहणाऱ्या आरोपींविरुद्ध मारेगाव पोलिसांनी विशेष मोहीम राबवून कारवाई केली. या मोहिमेत संबंधित आरोपींना ताब्यात घेऊन न्यायालयासमोर हजर करण्यात आले.
पोलीस सूत्रांकडून मिळालेल्या माहितीनुसार, विविध गुन्ह्यांमध्ये दाखल असलेल्या आरोपींना न्यायालयात उपस्थित राहण्यासाठी अनेकदा समन्स पाठविण्यात आले होते. मात्र, त्याकडे दुर्लक्ष करून ते गैरहजर राहत असल्याने पोलिसांनी शोधमोहीम राबवत संबंधित आरोपींना ताब्यात घेतले.
त्यानंतर त्यांच्या विरोधातील दाखल गुन्ह्यांची पडताळणी करून सर्व आरोपींना न्यायालयात हजर करण्यात आले. न्यायालयाने संबंधित प्रकरणांमध्ये पुढील तारखेस नियमित हजर राहण्याचे आदेश दिले आहेत.
मारेगाव पोलिसांनी केलेल्या या कारवाईमुळे कायद्याचे पालन करण्याबाबत नागरिकांमध्ये सकारात्मक संदेश गेला असून, न्यायालयीन प्रक्रियेला सहकार्य न करणाऱ्यांवर अशाच प्रकारची कारवाई सुरू राहणार असल्याची माहिती पोलीस सूत्रांनी दिली.
