श्रीवर्धन | प्रतिनिधी –
श्रीवर्धन तालुक्यातील जिल्हा परिषद शाळांमध्ये शिक्षकांची मोठ्या प्रमाणावर रिक्त पदे असल्याने विद्यार्थ्यांच्या शिक्षणावर परिणाम होत असल्याच्या पार्श्वभूमीवर शिवसेनेच्या शिष्टमंडळाने शिक्षण विभागाच्या अधिकाऱ्यांची भेट घेऊन निवेदन सादर केले.
यावेळी शिवसेना तालुकाप्रमुख ओमकार सदानंद शेळार, वरिष्ठ नेते तथा माजी जिल्हा परिषद सदस्य अविनाश कोलंबेकर, दिघीचे माजी सरपंच, माजी उपसरपंच तसेच शिवसेनेचे पदाधिकारी व कार्यकर्ते उपस्थित होते.
शिष्टमंडळाने तालुक्यातील शिक्षकांच्या रिक्त पदांचा प्रश्न उपस्थित करत विद्यार्थ्यांच्या शैक्षणिक नुकसानाबाबत तीव्र चिंता व्यक्त केली. विशेषतः दिघी जिल्हा परिषद मराठी शाळेतील चार रिक्त शिक्षक पदे तातडीने भरावीत, अशी मागणी करण्यात आली.
यावर वरिष्ठ प्रभारी मनोज मालोडे यांनी दिघी येथील चारही रिक्त पदे लवकरात लवकर भरली जातील, असे आश्वासन दिले.
तसेच वरिष्ठ सहाय्यक नामेश सोमकुवर यांनी सांगितले की, श्रीवर्धन तालुक्यात सध्या १६३ शिक्षक कार्यरत असून ५९ पदे रिक्त आहेत. ही रिक्त पदे भरण्याची प्रक्रिया सुरू असून ती लवकर पूर्ण करण्यात येणार आहे.
दरम्यान, बैठकीदरम्यान माजी जिल्हा परिषद सदस्य अविनाश कोलंबेकर यांनी गटशिक्षणाधिकारी रमेश चव्हाण यांच्याशी दूरध्वनीवरून चर्चा केली. यावेळी रमेश चव्हाण यांनी दिघी गावातील शाळेतील शिक्षकांची कमतरता पुढील तीन दिवसांत दूर करण्यात येईल, असे आश्वासन दिल्याची माहिती देण्यात आली.
यावेळी अविनाश कोलंबेकर म्हणाले, “शिक्षकांच्या कमतरतेमुळे विद्यार्थ्यांच्या शिक्षणाचे नुकसान होत असेल, तर शिवसेना गप्प बसणार नाही. विद्यार्थ्यांचे भविष्य आमच्यासाठी सर्वोच्च प्राधान्य आहे. गरज पडल्यास यासाठी तीव्र आंदोलन छेडण्यात येईल.”
