कडेगाव | प्रतिनिधी
राज्यातील शिक्षण विभागामार्फत कार्यरत असलेल्या ७१६ शालेय आधार केंद्रां संदर्भात विविध तक्रारी समोर आल्यानंतर शिक्षण विभागाने संबंधित कंपनीविरोधात कठोर भूमिका घेतली आहे. ऑपरेटरांच्या सर्व तक्रारींचे समाधानकारक निराकरण होईपर्यंत कंपनीची थकीत देयके रोखण्याचा निर्णय घेण्यात आला असून, संबंधित कंपनीला कारणे दाखवा नोटीस बजावण्याची प्रक्रिया सुरू करण्यात आली आहे.
मिळालेल्या माहितीनुसार, न्याय मिळावा या मागणीसाठी राज्यभरातील आधार ऑपरेटर पुणे येथील विद्य ऑनलाइन प्रायव्हेट लिमिटेड या कंपनीच्या कार्यालयात गेले होते. मात्र, कंपनीकडून समाधानकारक उत्तर मिळाले नसल्याचा आरोप ऑपरेटरांनी केला आहे. कंपनीकडून उडवाउडवीची भूमिका घेतल्याने उपस्थित ऑपरेटरांमध्ये तीव्र नाराजी व्यक्त करण्यात आली.
याचदरम्यान, कंपनीच्या कथित निष्काळजी आणि भोंगळ कारभारामुळे संतप्त झालेल्या एका ऑपरेटरने आत्महत्येचा प्रयत्न केल्याचा आरोप ऑपरेटरांकडून करण्यात आला. या घटनेनंतर उपस्थित ऑपरेटरांनी तीव्र संताप व्यक्त करत, अशा प्रकारच्या निष्काळजीपणामुळे एखादी जीवितहानी झाल्यास त्याला संबंधित कंपनी जबाबदार राहील, अशी भूमिका मांडली.
ऑपरेटरांनी सिक्युरिटी डिपॉझिट, थकीत कमिशन तसेच इतर आर्थिक देयकांबाबत शिक्षण विभागाकडे अनेक तक्रारी दाखल केल्या आहेत. या सर्व तक्रारींची सखोल चौकशी करून दोषींवर योग्य ती कारवाई करण्यात यावी, अशी मागणीही करण्यात आली आहे.
दरम्यान, शिक्षण विभागाने या प्रकरणाची गंभीर दखल घेत संबंधित कंपनीकडून स्पष्टीकरण मागविण्याची प्रक्रिया सुरू केली आहे. ऑपरेटरांच्या तक्रारींचे समाधानकारक निराकरण होईपर्यंत कंपनीची कोणतीही थकीत रक्कम अदा केली जाणार नसल्याचे शिक्षण विभागाने स्पष्ट केले आहे.
