बार्शी टाकळी | सारथी महाराष्ट्राचा न्यूज
भारत निवडणूक आयोगाच्या निर्देशानुसार राज्यभर सुरू असलेल्या विशेष सखोल मतदार यादी पुनरिक्षण (Special Intensive Revision – SIR) मोहिमेला बार्शी टाकळी तालुक्यात वेग आला आहे. या मोहिमेंतर्गत बूथ लेव्हल अधिकारी (BLO) घराघरात जाऊन मतदारांच्या माहितीची पडताळणी करत आहेत.
या उपक्रमात समाजसेवक सैय्यद इलियास सैय्यद राऊफ यांनीही जनजागृती व नागरिकांना सहकार्य करण्याचे आवाहन केले आहे.
या मोहिमेचा उद्देश मतदार यादी अधिक अचूक, पारदर्शक आणि अद्ययावत करणे हा आहे. त्यामुळे नागरिकांनी बीएलओंना आवश्यक ती माहिती अचूकपणे उपलब्ध करून द्यावी. तसेच नाव, पत्ता, छायाचित्र किंवा इतर तपशीलांमध्ये बदल असल्यास त्याची योग्य नोंद करून घ्यावी, असे आवाहन प्रशासनाने केले आहे.
पात्र असलेल्या प्रत्येक नागरिकाचे नाव मतदार यादीत कायम राहावे तसेच अपात्र किंवा डुप्लिकेट नोंदी वगळल्या जाव्यात, यासाठी ही विशेष मोहीम राबविण्यात येत आहे.
प्रशासनाने नागरिकांना अफवांवर विश्वास न ठेवता अधिकृत माहितीच्या आधारेच आवश्यक प्रक्रिया पूर्ण करण्याचे आवाहन केले असून, मतदार यादी अद्ययावत करण्यासाठी सर्वांनी सक्रिय सहकार्य करावे, असेही आवाहन करण्यात आले आहे.
