औंढा नागनाथ | प्रतिनिधी | सारथी महाराष्ट्राचा न्यूज
एम.आय.पी. कॉलेज ऑफ फूड टेक्नॉलॉजी, औंढा नागनाथ येथे विद्यार्थी, प्राध्यापक आणि कर्मचाऱ्यांसाठी गॅस सेफ्टी विषयावरील विशेष प्रशिक्षण कार्यक्रम उत्साहात पार पडला. या प्रशिक्षणामध्ये एलपीजी गॅसचा सुरक्षित वापर, गॅस गळती झाल्यास घ्यावयाची खबरदारी, आग लागल्यास करावयाच्या उपाययोजना तसेच अग्निशमन यंत्राचा योग्य वापर याबाबत सविस्तर मार्गदर्शन करण्यात आले.
प्रशिक्षकांनी उपस्थितांना प्रत्यक्ष प्रात्यक्षिकांद्वारे गॅस सुरक्षेचे महत्त्व समजावून सांगितले. तसेच आपत्कालीन परिस्थितीत योग्य प्रकारे प्रतिसाद कसा द्यावा, याबाबतही मार्गदर्शन करण्यात आले. प्रशिक्षणादरम्यान प्राध्यापक, कर्मचारी आणि विद्यार्थ्यांनी उत्स्फूर्त सहभाग नोंदवत विविध शंकांचे निरसन करून घेतले.
महाविद्यालयाचे प्राचार्य डॉ. अब्दुल रहमान यांच्या मार्गदर्शनाखाली आयोजित करण्यात आलेल्या या कार्यक्रमात प्राचार्य रफत आलम सिद्दिकी, जाफिर पठाण, पी. एस. मुनेश्वर, शेख शहजाद, के. बी. सदाल, जुनेद पटेल, सदाशिव सोनवणे, तुराब खाँ पठाण, शेख अश्फाक, शेख मोहीन, शेख तोसिफ तसेच महाविद्यालयातील इतर प्राध्यापक व कर्मचारी उपस्थित होते.
यावेळी महाविद्यालय प्रशासनाने विद्यार्थ्यांमध्ये आपत्कालीन परिस्थिती हाताळण्याबाबत जागरूकता निर्माण करण्यासाठी अशा प्रकारचे सुरक्षा प्रशिक्षण वेळोवेळी आयोजित केले जात असल्याचे सांगितले. गॅस सुरक्षिततेबाबत प्रत्यक्ष प्रात्यक्षिकांमुळे उपस्थितांमध्ये जनजागृती होऊन आपत्ती व्यवस्थापनाविषयी आत्मविश्वास वाढल्याची भावना व्यक्त करण्यात आली.
