पुणे | प्रतिनिधी | सारथी महाराष्ट्राचा न्यूज
ज्येष्ठ साहित्यिक, कवी आणि समाजसेवक विलास बाबर यांना साहित्य क्षेत्रातील उल्लेखनीय योगदानाबद्दल ‘महाकवी कालिदास साहित्य साधना पुरस्कार’ प्रदान करण्यात आला. ज्येष्ठ गझलकार सुधीर कुबेर तसेच प्रार्थना मॅडम यांच्या हस्ते आयोजित काव्यसंमेलनात त्यांचा सन्मान करण्यात आला.
विलास बाबर हे साहित्य क्षेत्रासोबतच सामाजिक कार्यातही सक्रिय असून, युवा क्रांती फाउंडेशन अंतर्गत पोलिस मित्र, ग्राहक व पत्रकार संरक्षण आणि माहिती अधिकार संघटना या संस्थेमध्ये पुणे सदस्य म्हणून कार्यरत आहेत. संस्थेच्या माध्यमातून ते सामाजिक जनजागृती, नागरिकांच्या समस्या, पत्रकार संरक्षण तसेच विविध समाजोपयोगी उपक्रमांमध्ये सातत्याने योगदान देत आहेत.
यावेळी युवा क्रांती फाउंडेशनचे संस्थापक व राष्ट्रीय अध्यक्ष रविंद्र सूर्यवंशी यांनी विलास बाबर यांचे अभिनंदन करत त्यांच्या साहित्यिक आणि सामाजिक कार्याचे कौतुक केले. समाजासाठी प्रेरणादायी कार्य करणाऱ्या व्यक्तींचा सन्मान हा नव्या पिढीसाठी दिशादर्शक असल्याचे त्यांनी नमूद केले.
पुरस्कार स्वीकारताना विलास बाबर यांनी हा सन्मान साहित्यप्रेमी, वाचक, सहकारी आणि आपल्या सर्व शुभेच्छुकांना समर्पित करत सर्वांचे आभार व्यक्त केले.
या पुरस्कारामुळे साहित्य, सामाजिक आणि पत्रकारिता क्षेत्रातून विलास बाबर यांच्यावर अभिनंदनाचा वर्षाव होत असून, त्यांच्या कार्याबद्दल सर्व स्तरांतून गौरव व्यक्त केला जात आहे.
