कन्नड | प्रतिनिधी
कन्नड तालुक्यातील मुंगसापूर येथील एका आश्रमामध्ये वैध वैद्यकीय पदवीशिवाय बेकायदेशीर वैद्यकीय व्यवसाय केल्याच्या आरोपांप्रकरणी संबंधित व्यक्तीविरुद्ध फौजदारी गुन्हा दाखल करण्यासाठी गटविकास अधिकारी (बीडीओ) ओमप्रकाश रामावत यांनी कन्नड ग्रामीण पोलिसांकडे अहवाल सादर केला आहे. पंचायत समिती कार्यालयासमोर सुरू असलेल्या बेमुदत उपोषणानंतर प्रशासनाने हे पाऊल उचलले.
तक्रारीनुसार, संबंधित व्यक्तीकडे कोणतीही वैध वैद्यकीय पदवी नसताना मोठ्या प्रमाणात रुग्णांवर उपचार करण्यात आले. तसेच कॅन्सर, किडनीसारख्या गंभीर आजारांवर उपचार करण्याच्या नावाखाली रुग्णांची आर्थिक फसवणूक झाल्याचाही आरोप करण्यात आला आहे.
याशिवाय, बोगस उपचारांमुळे काही रुग्णांचा मृत्यू झाल्याचा आरोपही तक्रारदार कडूबा मालोदे आणि शंकर जाधव यांनी प्रशासनाकडे केला आहे.
तक्रारीत संबंधित व्यक्तीने मुंगसापूर येथील सुमारे १२ ते १५ एकर जमिनीवर बेकायदेशीर अतिक्रमण केल्याचाही आरोप करण्यात आला आहे. तसेच जिल्हाधिकारी कार्यालयाची मंजुरी न घेता हेलिपॅड उभारण्यात आल्याचेही नमूद करण्यात आले असून, तहसीलदार आणि वन विभागाने अतिक्रमण हटविण्याचे निर्देश दिल्याची माहिती देण्यात आली.
२४ जून रोजी आरोग्य विभाग व अन्न व औषध प्रशासनाच्या पथकाने आश्रमावर छापा टाकून पाच रजिस्टर, औषधे आणि महत्त्वाची कागदपत्रे जप्त केली होती. मात्र, त्यानंतर गुन्हा दाखल करण्यात विलंब होत असल्याचा आरोप करण्यात आला होता.
प्रशासनाच्या दिरंगाईच्या निषेधार्थ अखिल भारतीय किसान सभेचे उदय शांताराम गवळी, बबनराव पवार, पांडुरंग मुरुकुंडे आदी कार्यकर्त्यांनी २८ जूनपासून बेमुदत उपोषण सुरू केले होते. या आंदोलनानंतर प्रशासनाने दखल घेत १४ जुलै रोजी संबंधितांविरुद्ध गुन्हा दाखल करण्यासाठी पोलिसांकडे अहवाल सादर केला.
