यमुना सामाजिक शैक्षणिक संस्थेतर्फे कर्जतमधील ३५० विद्यार्थ्यांना दफ्तर व छत्रीचे वाटप
उरण | प्रतिनिधी :
“दुर्गम भागातील विद्यार्थ्यांना शैक्षणिक सुविधांची वानवा असते. अशा विद्यार्थ्यांना आवश्यक शैक्षणिक साहित्य उपलब्ध करून देणे ही आपली नैतिक जबाबदारी आहे. त्यामुळे गेल्या १५ वर्षांपासून दफ्तर, छत्री यांसारख्या प्राथमिक सुविधा विद्यार्थ्यांपर्यंत पोहोचविण्याचा सातत्याने प्रयत्न करत आहे. कर्जत तालुक्याशी आपले वेगळे नाते आहे,” असे प्रतिपादन आंतरराष्ट्रीय कामगार नेते महेंद्रशेठ घरत यांनी केले.
पनवेल तालुक्यातील शेलघर येथील यमुना सामाजिक शैक्षणिक संस्थेच्या वतीने कर्जत तालुक्यातील दुर्गम भागातील विद्यार्थ्यांना दफ्तर व छत्रीचे वाटप करण्यात आले. मंगळवारी (ता. १४) आयोजित या उपक्रमात रायगड जिल्हा परिषद शाळा खांडस, तुंगी, आंबेरपाडा, काठेवाडी तसेच परिसरातील अंगणवाड्यांमधील एकूण ३५० विद्यार्थ्यांना शैक्षणिक साहित्याचे वितरण करण्यात आले.
यमुना सामाजिक शैक्षणिक संस्थेचे संस्थापक-अध्यक्ष तथा आंतरराष्ट्रीय कामगार नेते महेंद्रशेठ घरत आणि शुभांगीताई घरत यांच्या वतीने हा उपक्रम राबविण्यात आला. यावेळी घरत कुटुंबीयांनीही उत्स्फूर्त सहभाग नोंदविला.
कार्यक्रमात उपस्थित शिक्षकांनी महेंद्रशेठ घरत यांच्या सामाजिक बांधिलकीचे कौतुक करत, “दरवर्षी विद्यार्थ्यांना शैक्षणिक साहित्य उपलब्ध करून देत ते त्यांच्या शैक्षणिक प्रगतीसाठी मोलाचे योगदान देत आहेत,” अशा भावना व्यक्त केल्या.
यावेळी राम म्हात्रे, वासंती म्हात्रे, गुलाबशेठ घरत, ललिताताई घरत, श्रीकांत घरत, मीनाक्षी घरत, शकुंतलाताई ठाकूर, बानुबाई भगत, यशवंत ढोंगे तसेच एम. जी. ग्रुपचे सहकारी उपस्थित होते.
— प्रतिनिधी, सारथी महाराष्ट्राचा न्यूज
