सर्वसाधारण सभेसह आरोग्य तपासणी, सांस्कृतिक कार्यक्रम आणि विविध कलाकृतींचे सादरीकरण; १,८७० महिलांची उत्स्फूर्त उपस्थिती
📰 सारथी महाराष्ट्राचा न्यूज | परभणी | प्रतिनिधी :
महिला आर्थिक विकास महामंडळ (महाराष्ट्र शासन), परभणी यांच्या मार्गदर्शनाखाली तसेच सर्वोदय लोक संचलित साधन केंद्र, सोनपेठ यांच्या वतीने महिला स्वायंसहाय्यता बचतगटांची सर्वसाधारण सभा व भव्य महिला मेळावा उत्साहपूर्ण वातावरणात संपन्न झाला. या मेळाव्यास तब्बल १,८७० महिलांनी उपस्थित राहून कार्यक्रमाला अभूतपूर्व प्रतिसाद दिला.
महिलांच्या आर्थिक, सामाजिक आणि वैयक्तिक सक्षमीकरणाच्या उद्देशाने आयोजित करण्यात आलेल्या या मेळाव्यात विविध उपक्रमांचे आयोजन करण्यात आले होते. कार्यक्रमात महिलांसाठी मनोरंजनात्मक स्पर्धा, सांस्कृतिक कार्यक्रम तसेच विविध कलाकृती व हस्तकला नमुन्यांचे आकर्षक प्रदर्शन भरविण्यात आले. महिलांनी आपल्या कलागुणांचे प्रभावी सादरीकरण करत उपस्थितांची मने जिंकली.
मेळाव्यात सहभागी महिलांची आरोग्य तपासणीही करण्यात आली. तज्ज्ञ डॉक्टर व आरोग्य कर्मचाऱ्यांनी महिलांना आरोग्याविषयी मार्गदर्शन करत नियमित तपासणी, पोषण, स्वच्छता आणि आरोग्याची काळजी घेण्याबाबत महत्त्वपूर्ण माहिती दिली.
यावेळी महिला बचतगटांच्या कामकाजाचा आढावा घेण्यात आला. बचतगटांद्वारे महिलांनी स्वावलंबनाच्या दिशेने केलेली वाटचाल, विविध शासकीय योजनांचा लाभ आणि उद्योग-व्यवसायाच्या संधी याबाबत उपस्थित महिलांना मार्गदर्शन करण्यात आले. महिलांनी एकमेकांच्या अनुभवांची देवाणघेवाण करत भविष्यात बचतगट अधिक सक्षम करण्याचा निर्धार व्यक्त केला.
कार्यक्रमाच्या यशस्वी आयोजनासाठी महिला आर्थिक विकास महामंडळ, सर्वोदय लोक संचलित साधन केंद्र, सोनपेठ तसेच संबंधित अधिकारी, कर्मचारी व बचतगटांच्या पदाधिकाऱ्यांनी विशेष परिश्रम घेतले. मेळाव्यामुळे महिलांमध्ये आत्मविश्वास वाढण्यासह सामाजिक आणि आर्थिक सक्षमीकरणाला अधिक बळ मिळणार असल्याची भावना उपस्थितांनी व्यक्त केली.
