📰 सारथी महाराष्ट्राचा न्यूज | पाटोदा | प्रतिनिधी
एसटी कर्मचाऱ्यांच्या सेवा विषयक अडचणी आणि प्रलंबित मागण्यांवर तोडगा काढण्याच्या उद्देशाने मान्यताप्राप्त कामगार संघटनेच्या पदाधिकाऱ्यांनी बीड जिल्ह्यातील पाटोदा आगाराला भेट दिली. यावेळी आगार प्रमुख डोके साहेब यांच्यासमवेत झालेल्या बैठकीत कर्मचाऱ्यांसमोरील विविध प्रश्नांवर सविस्तर चर्चा करण्यात आली.
कर्मचाऱ्यांना भेडसावणाऱ्या अडचणी, प्रशासकीय बाबी तसेच प्रलंबित प्रकरणांचा लवकर निपटारा व्हावा, यासाठी आवश्यक ती कार्यवाही करण्याची मागणी संघटनेच्या पदाधिकाऱ्यांनी केली. कर्मचारी हिताच्या मुद्द्यांवर प्रशासनाने सकारात्मक भूमिका घ्यावी, अशी अपेक्षाही व्यक्त करण्यात आली.
बैठकीनंतर पर्यावरण संरक्षणाचा संदेश समाजापर्यंत पोहोचविण्यासाठी आगार परिसरात वृक्षारोपणाचा उपक्रम राबविण्यात आला. उपस्थित पदाधिकारी आणि कर्मचाऱ्यांनी वृक्षांची लागवड करून पर्यावरण संवर्धनाची सामूहिक जबाबदारी जपण्याचा निर्धार व्यक्त केला.
या कार्यक्रमास विभागीय अध्यक्ष चातुर साहेब, विभागीय सचिव गणेश चव्हाण, वल्लभ चिरके, विभागीय सहसचिव श्रीकांत येडे पाटील, आगाराध्यक्ष चौधरी, आधार सचिव बाळासाहेब बांगर, सहसचिव बाळासाहेब डफळ, ज्येष्ठ नेते अजिनाथ वारे, रावसाहेब गायकवाड तसेच आगारातील अधिकारी, कर्मचारी आणि कामगार मोठ्या संख्येने उपस्थित होते.
