📰 सारथी महाराष्ट्राचा न्यूज | पुणे | शहर प्रतिनिधी
सोशल मीडियावर सहज मिळणाऱ्या छोट्या ऑनलाईन टास्कच्या बदल्यात पैसे कमावण्याचे आमिष दाखवून काही तरुणांना देशविघातक कारवायांशी संबंधित जाळ्यात ओढण्याचा प्रयत्न होत असल्याची माहिती तपास यंत्रणांच्या चौकशीत समोर आली आहे. या पार्श्वभूमीवर तरुणांनी अत्यंत सतर्क राहावे, असे आवाहन करण्यात आले आहे.
तपास यंत्रणांच्या माहितीनुसार, सुरुवातीला एखादा फोटो पाठविणे, विशिष्ट ठिकाणाची माहिती देणे किंवा सोशल मीडियावरील साधी कामे करण्यासाठी पैसे दिले जातात. त्यानंतर संबंधित व्यक्तीचा विश्वास संपादन करून त्याच्याकडून अधिक गंभीर स्वरूपाची कामे करून घेण्याचा प्रयत्न केला जात असल्याची बाब समोर आली आहे.
तरुणांनी सतर्क राहण्याचे आवाहन
तपास यंत्रणांनी दिलेल्या माहितीनुसार, काही संशयित व्यक्ती बनावट नोटांचे रॅकेट, अमली पदार्थांची तस्करी तसेच सीमेपलीकडील शस्त्रास्त्र तस्करीशी संबंधित नेटवर्कशी संबंधित असल्याचा संशय व्यक्त करण्यात आला आहे. या संदर्भातील आरोपांची तपास यंत्रणांकडून चौकशी सुरू असून अंतिम निष्कर्ष अद्याप समोर आलेला नाही.
त्यामुळे सोशल मीडियावर अनोळखी व्यक्तींनी दिलेली ऑनलाईन कामे, त्याबदल्यात मिळणारे पैसे किंवा संशयास्पद संदेश यांना बळी न पडता अशा प्रकारच्या कोणत्याही संशयास्पद हालचालींची माहिती तातडीने संबंधित पोलिस किंवा तपास यंत्रणांना द्यावी, असे आवाहन करण्यात आले आहे.
