📰 सारथी महाराष्ट्राचा न्यूज | अंबाजोगाई | प्रतिनिधी
नवी दिल्ली येथील जंतर-मंतर मैदानावर विविध मागण्यांसाठी उपोषण करत असलेले प्रसिद्ध अभियंता, पर्यावरणवादी आणि गांधीवादी नेते सोनम वांगचुक यांच्या समर्थनार्थ अंबाजोगाई येथे पत्रकार परमेश्वर गित्ते यांच्या वतीने एकदिवसीय लाक्षणिक उपोषणाचे आयोजन करण्यात आले आहे.
हे उपोषण शुक्रवार, दि. १७ एप्रिल रोजी सकाळी ११ ते सायंकाळी ५ वाजेपर्यंत उपजिल्हाधिकारी कार्यालयासमोर होणार असल्याची माहिती पत्रकार परमेश्वर गित्ते यांनी दिली.
यावेळी गित्ते यांनी सांगितले की, शिक्षण, आरोग्य आणि लोककल्याणाशी संबंधित अनेक प्रश्नांवर केंद्र सरकारची भूमिका समाधानकारक नसल्याची भावना नागरिकांमध्ये आहे. तसेच, सोनम वांगचुक यांच्या उपोषणाकडे केंद्र सरकार दुर्लक्ष करत असल्याचा आरोप त्यांनी केला.
या पार्श्वभूमीवर त्यांच्या मागण्यांना पाठिंबा देण्यासाठी आणि लोकशाही मार्गाने निषेध नोंदविण्यासाठी अंबाजोगाई येथे एकदिवसीय उपोषण आयोजित करण्यात आले असल्याचे त्यांनी स्पष्ट केले.
या उपोषणात सामाजिक कार्यकर्ते, विविध संघटनांचे पदाधिकारी, युवक, विद्यार्थी आणि नागरिकांनी मोठ्या संख्येने सहभागी व्हावे, असे आवाहन पत्रकार परमेश्वर गित्ते यांनी केले आहे.
