📰 सारथी महाराष्ट्राचा न्यूज | बांबवडे | प्रतिनिधी
शाहूवाडी तालुक्यातील बांबवडे आणि परिसरातील हॉटेल्स, बेकरी तसेच धाब्यांवर अन्न व औषध प्रशासन (FDA) विभागाने अचानक धडक तपासणी मोहीम राबविल्याने परिसरात खळबळ उडाली आहे. या मोहिमेत विविध खाद्यपदार्थांची तपासणी करण्यात आली असून संशयास्पद अन्नपदार्थांचे नमुने जप्त करून प्रयोगशाळेत तपासणीसाठी पाठविण्यात आले आहेत.
मिळालेल्या माहितीनुसार, अन्नभेसळीच्या संशयावरून प्रशासनाने विविध आस्थापनांमधील खाद्यपदार्थांचे नमुने ताब्यात घेतले आहेत. या नमुन्यांचा प्रयोगशाळेतील अहवाल आल्यानंतर पुढील कारवाई करण्यात येणार आहे.
कारवाईची माहिती परिसरात पसरताच अनेक हॉटेल, बेकरी व धाबा चालकांमध्ये घबराट पसरली. काही व्यावसायिकांनी ग्राहकांची वर्दळ सुरू असतानाच दुकाने बंद केल्याचे दिसून आले. तसेच गोगवे, डोणोली आणि परिसरातील काही धाबेचालकांनी खबरदारीचा उपाय म्हणून रात्रीची सेवा बंद ठेवली.
अन्न व औषध प्रशासनाने ही मोहीम अत्यंत गोपनीय पद्धतीने राबविल्याचे सांगितले आहे. यामुळे कोणालाही पूर्वकल्पना मिळाली नाही आणि संशयित अन्नपदार्थ लपविण्याची संधीही मिळाली नाही.
अन्न व औषध प्रशासनाच्या अधिकाऱ्यांनी सांगितले की, जप्त करण्यात आलेल्या नमुन्यांचे प्रयोगशाळेतील अहवाल प्राप्त झाल्यानंतर दोषी आढळणाऱ्या संबंधित व्यावसायिकांवर अन्न सुरक्षा कायद्यानुसार कठोर कायदेशीर कारवाई करण्यात येईल.
