📰 सारथी महाराष्ट्राचा न्यूज | चांदवड | प्रतिनिधी
चांदवड तालुक्यातील वाहेगाव-साळ परिसरात सुरू असलेल्या लोडशेडिंगमुळे विद्यार्थी आणि नागरिकांना मोठा त्रास सहन करावा लागत आहे. विशेषतः दररोज सायंकाळी ७.३० ते रात्री १० वाजेपर्यंत वीजपुरवठा खंडित होत असल्याने नागरिकांमध्ये नाराजीचे वातावरण आहे.
या वेळेत वीज नसल्यामुळे नागरिकांच्या जेवणाच्या वेळेवर परिणाम होत असून, शाळकरी विद्यार्थ्यांच्या अभ्यासातही मोठा अडथळा निर्माण होत आहे. परीक्षांचा काळ आणि शैक्षणिक अभ्यास लक्षात घेता या वेळेतील लोडशेडिंगमुळे विद्यार्थ्यांना अडचणींचा सामना करावा लागत असल्याची भावना पालकांनीही व्यक्त केली आहे.
स्थानिक नागरिक आणि विद्यार्थ्यांनी महावितरणकडे लोडशेडिंगची वेळ बदलण्याची मागणी केली आहे. संध्याकाळच्या महत्त्वाच्या वेळेत वीजपुरवठा बंद न करता इतर योग्य वेळेत लोडशेडिंग करण्यात यावे, जेणेकरून विद्यार्थ्यांच्या शिक्षणावर आणि नागरिकांच्या दैनंदिन जीवनावर होणारा परिणाम टाळता येईल, अशी मागणी करण्यात येत आहे.
