चिखलदरा | प्रतिनिधी
अमरावती जिल्ह्यातील प्रसिद्ध पर्यटनस्थळ चिखलदरा येथे पर्यटकांकडून जीव धोक्यात घालून फोटोग्राफी आणि स्टंटबाजी केली जात असल्याचे प्रकार समोर आले आहेत. सोशल मीडियावर व्हायरल झालेल्या व्हिडिओंमध्ये काही पर्यटक शेकडो फूट खोल दरीच्या काठावरील खडकांवर बसून फोटो आणि रील्स शूट करताना दिसत आहेत. त्यामुळे पर्यटकांच्या सुरक्षेचा गंभीर प्रश्न ऐरणीवर आला आहे.
रील्स बनविण्याच्या अति उत्साहात अनेक तरुण हरिकेन पॉइंटसह विविध धोकादायक ठिकाणी जाऊन स्वतःचा जीव धोक्यात घालत असल्याचे दिसून येत आहे. प्रशासनाने अशा ठिकाणी जाण्यास बंदी घातलेली असतानाही काही पर्यटक नियमांचे उल्लंघन करून धोकादायक कड्यांवर जाऊन छायाचित्रे काढत आहेत.
यापूर्वीही चिखलदरा घाट परिसरात अपघातांच्या घटना घडल्या असून, काही वाहनांनाही दरीत कोसळल्याच्या घटना समोर आल्या आहेत. त्यामुळे पर्यटकांच्या सुरक्षिततेच्या दृष्टीने प्रशासनाने कडक पोलीस बंदोबस्तासह काही ठिकाणी एकमार्गी वाहतूक व्यवस्था लागू केली आहे.
मात्र, वारंवार सूचना आणि निर्बंध असूनही काही पर्यटकांकडून निष्काळजीपणा केला जात असल्याने मोठी दुर्घटना घडण्याची भीती व्यक्त होत आहे. पर्यटकांनी स्वतःच्या आणि इतरांच्या सुरक्षिततेचा विचार करून धोकादायक ठिकाणी जाऊन फोटो किंवा रील्स बनविणे टाळावे, असे आवाहन प्रशासनाकडून करण्यात येत आहे.
