📰 सारथी महाराष्ट्राचा न्यूज | मानवत | प्रतिनिधी
मानवत येथील तहसीलदार पांडुरंग माचेवाड यांनी एका दिव्यांग वृद्ध व्यक्तीला मदत करण्यासाठी दाखविलेल्या संवेदनशीलतेचा प्रसंग सध्या सोशल मीडियावर चर्चेचा विषय ठरला आहे. त्यांच्या या कृतीचे सर्व स्तरातून कौतुक होत असून “अधिकारी असावा तर असा!” अशा प्रतिक्रिया नागरिकांकडून व्यक्त होत आहेत.
शासकीय कामानिमित्त तहसील कार्यालयात आलेल्या एका दिव्यांग वृद्ध व्यक्तीला तहसीलदारांच्या दालनापर्यंत जाणे शक्य नसल्याचे लक्षात येताच, तहसीलदार पांडुरंग माचेवाड यांनी कोणताही बडेजाव न करता स्वतः दालनाबाहेर येत त्या वृद्धाची भेट घेतली.
कार्यालयाबाहेरील पायरीवर बसलेल्या दिव्यांग व्यक्तीजवळ जाऊन त्यांनी त्यांची कागदपत्रे तपासली. वृद्धाला सोयीचे व्हावे म्हणून स्वतःही पायरीवर बसत त्यांनी आपुलकीने संवाद साधला, त्यांच्या अडचणी जाणून घेतल्या आणि संबंधित काम तातडीने मार्गी लावण्याचे निर्देश दिले.
या संपूर्ण घटनेचा व्हिडिओ उपस्थित नागरिकांनी मोबाईलमध्ये चित्रित केला असून तो सोशल मीडियावर मोठ्या प्रमाणात व्हायरल झाला आहे. तहसीलदारांच्या या मानवतावादी आणि संवेदनशील वर्तनाचे नागरिक, सामाजिक कार्यकर्ते आणि नेटकऱ्यांकडून भरभरून कौतुक करण्यात येत आहे.
सामान्य नागरिकांप्रती प्रशासनाने संवेदनशील राहावे, याचे उत्तम उदाहरण म्हणून तहसीलदार पांडुरंग माचेवाड यांच्या या कृतीकडे पाहिले जात आहे.
