📰 सारथी महाराष्ट्राचा न्यूज | पाथरी | प्रतिनिधी :
परभणी जिल्ह्याचे जिल्हा शल्यचिकित्सक डॉ. नागेश लखमवार यांनी शुक्रवारी पाथरी येथील ग्रामीण रुग्णालयाला आकस्मिक भेट देऊन विविध विभागांची सखोल पाहणी केली. यावेळी रुग्णालयातील काही बाबींवर त्यांनी असमाधान व्यक्त करत तत्काळ सुधारणा करण्याच्या लेखी व तोंडी सूचना संबंधित अधिकाऱ्यांना दिल्या.
भेटीदरम्यान डॉ. लखमवार यांनी रुग्णालयातील स्वच्छता व्यवस्था, बाह्यरुग्ण विभाग (ओपीडी), ऑपरेशन थिएटर, नवजात शिशू विभाग, प्रसूती कक्ष (डिलिव्हरी रूम) तसेच इतर आरोग्य सेवा विभागांची पाहणी केली. रुग्णांना दर्जेदार व तत्पर आरोग्यसेवा मिळावी, तसेच त्यांच्याशी सौजन्यपूर्ण वर्तन ठेवण्याचे निर्देश त्यांनी वैद्यकीय अधिकारी व कर्मचाऱ्यांना दिले.
प्रसूतीसाठी येणाऱ्या महिलांना अनावश्यकपणे परभणी येथे रेफर न करता, शक्य त्या सर्व प्रसूती ग्रामीण रुग्णालयातच करण्यावर भर द्यावा, अशा स्पष्ट सूचना त्यांनी दिल्या.
याशिवाय रुग्णालय परिसरात कायमस्वरूपी स्वच्छता राखणे, शुद्ध पिण्याच्या पाण्याची उपलब्धता सुनिश्चित करणे, सर्व अधिकारी व कर्मचारी यांनी वेळेवर उपस्थित राहणे तसेच दिवस-रात्र रुग्णांना गुणवत्तापूर्ण, तत्पर आणि संवेदनशील आरोग्यसेवा उपलब्ध करून देण्याच्या सक्त सूचना डॉ. लखमवार यांनी दिल्या.
रुग्णालयातील सेवा अधिक प्रभावी, शिस्तबद्ध आणि रुग्णाभिमुख करण्यासाठी आवश्यक त्या सुधारणा तातडीने पूर्ण करण्याचे निर्देशही त्यांनी संबंधित अधिकाऱ्यांना दिले.
