📰 सारथी महाराष्ट्राचा न्यूज | अंबाजोगाई | प्रतिनिधी
गांधीवादी विचारवंत, संशोधक आणि रमण मॅगसेसे पुरस्कार विजेते सोनम वांगचुक यांच्या आमरण उपोषणाचा १९ वा दिवस उलटल्यानंतरही केंद्र सरकारकडून कोणतीही दखल घेतली नसल्याचा आरोप करत अंबाजोगाई येथे पत्रकार परमेश्वर गित्ते यांनी एकदिवसीय लाक्षणिक उपोषण करून आंदोलनाला पाठिंबा दिला.
यावेळी बोलताना परमेश्वर गित्ते यांनी, “आंतरराष्ट्रीय स्तरावर सन्मानित संशोधकाच्या आंदोलनाकडे दुर्लक्ष होणे दुर्दैवी असून, लोकशाहीत आंदोलनकर्त्यांच्या भावना आणि त्यांच्या जीविताची दखल घेणे आवश्यक आहे,” असे मत व्यक्त केले.
या आंदोलनाला राष्ट्रवादी काँग्रेस पक्ष (शरदचंद्र पवार गट) चे प्रदेशाध्यक्ष आ. शशिकांत शिंदे तसेच ज्येष्ठ विधीज्ञ ॲड. असीम सरोदे यांनी दूरध्वनीद्वारे पाठिंबा दर्शविला. “आम्ही माणूस म्हणून तुमच्या सोबत आहोत,” अशी भूमिका त्यांनी व्यक्त करत आंदोलन अधिक व्यापक करण्याचे आवाहन केले.
अंबाजोगाई येथील उपजिल्हाधिकारी कार्यालयासमोर सकाळी ११ ते सायंकाळी ५ या वेळेत झालेल्या या लाक्षणिक उपोषणाला वंचित बहुजन आघाडी, मराठा सेवा संघ, लोक जनशक्ती पार्टी, समाजवादी पार्टी, काँग्रेस, राष्ट्रवादी काँग्रेस पक्ष (शरदचंद्र पवार गट) तसेच विविध सामाजिक संघटना व संस्थांनी पाठिंबा दिला.
या प्रसंगी माजी आमदार पृथ्वीराज साठे, राज्य दंत परिषदेचे अध्यक्ष डॉ. नरेंद्र काळे, ॲड. असीम सरोदे, अनिकेत लोहिया, प्रा. कल्पना पाटील, ॲड. आनंतराव जगतकर, दिलीपदादा सांगळे, ॲड. माणिकराव बावणे, शिवाजी दादा कुलकर्णी, अशोक हेडे, ॲड. इस्माईल गवळी, राजेश वाहुळे, डॉ. राजेश इंगोले, डॉ. नागेश जोंधळे, मेजर अजिमोद्दीन इनामदार, ज्येष्ठ साहित्यिक दत्ता वालेकर, सेवानिवृत्त न्यायाधीश ॲड. बाबुराव तिडके, नगरसेवक अकबर पठाण, सुनील जगताप, कालिदास आपेट यांच्यासह विविध राजकीय, सामाजिक व शैक्षणिक क्षेत्रातील मान्यवर उपस्थित होते.
उपस्थितांनी आंदोलनकर्त्यांच्या मागण्यांची केंद्र सरकारने तातडीने दखल घ्यावी, तसेच सोनम वांगचुक आणि त्यांच्या सहकाऱ्यांना आवश्यक सुविधा उपलब्ध करून द्याव्यात, अशी मागणी केली.
अंबाजोगाईत मानवता आणि लोकशाही मूल्यांच्या रक्षणासाठी व्यक्त करण्यात आलेल्या या पाठिंब्याची राज्यभर चर्चा होत असून, “माणूस जगला पाहिजे” या भूमिकेतून हे आंदोलन करण्यात आल्याचे पत्रकार परमेश्वर गित्ते यांनी सांगितले.
