📰 सारथी महाराष्ट्राचा न्यूज | मळद | प्रतिनिधी
खडकी (ता. दौंड) येथील श्रावणी कुदळे हिने नीट (NEET) परीक्षेत उल्लेखनीय यश संपादन करत आपल्या गावासह राज्याचे नाव उज्ज्वल केले आहे. राज्य आदर्श शिक्षक पुरस्कार प्राप्त शिक्षक कृष्णा कुदळे आणि सौ. जयश्री कुदळे यांची कन्या असलेल्या श्रावणीने आपल्या मेहनत, जिद्द आणि सातत्यपूर्ण अभ्यासाच्या जोरावर ही यशस्वी कामगिरी केली आहे.
श्रावणीने नीट परीक्षेत ७२० पैकी ७१० गुण मिळवत OBC प्रवर्गातील मुलींमध्ये देशात प्रथम क्रमांक पटकावल्याचा दावा करण्यात आला आहे. तसेच महाराष्ट्रात प्रथम क्रमांक मिळवत अखिल भारतीय क्रमवारीत (AIR) पाचवे स्थान मिळविल्याचे सांगण्यात आले आहे.
श्रावणीचा शैक्षणिक प्रवास अनेक विद्यार्थ्यांसाठी प्रेरणादायी ठरला आहे. जिल्हा परिषद शाळेतून प्राथमिक शिक्षण पूर्ण केल्यानंतर तिने शिष्यवृत्ती परीक्षांमध्ये सातत्याने गुणवत्ता यादीत स्थान मिळवले. सेमी-इंग्रजी माध्यमातून दहावीपर्यंतचे शिक्षण घेत असताना अभ्यासात सातत्य राखत तिने उल्लेखनीय यश संपादन केले.
श्रावणीच्या या यशाबद्दल शैक्षणिक, सामाजिक तसेच विविध क्षेत्रांतून तिच्यावर अभिनंदनाचा वर्षाव होत असून, तिच्या उज्ज्वल भविष्यासाठी शुभेच्छा व्यक्त केल्या जात आहेत.
