📰 सारथी महाराष्ट्राचा न्यूज | मानवत | प्रतिनिधी
भारतीय स्टेट बँकेच्या (SBI) मानवत शाखेत 11 नोव्हेंबर 2024 रोजी सहाय्यक व्यवस्थापक आणि सुरक्षा रक्षक यांनी खातेदार अहमद अली अन्सारी यांच्याशी गैरवर्तन करून त्यांचा अपमान केल्याचा तसेच त्यांना हात धरून बँकेबाहेर काढल्याचा आरोप करण्यात आला आहे.
या प्रकरणी अहमद अन्सारी यांनी विविध स्तरांवर तक्रारी दाखल केल्याचे सांगितले असून, संबंधित अधिकारी व कर्मचाऱ्यांवर अद्याप कोणतीही कारवाई झालेली नसल्याचा दावा त्यांनी केला आहे. न्याय मिळावा यासाठी त्यांनी यापूर्वी विभागीय आयुक्त कार्यालयासमोर दोन वेळा आमरण उपोषण केले होते. त्यानंतर विभागीय आयुक्त कार्यालयाने संबंधित यंत्रणेला आवश्यक कार्यवाही करण्याबाबत पत्राद्वारे सूचना दिल्याचे सांगितले जाते. मात्र, अद्याप कोणतीही ठोस कारवाई झालेली नसल्याचा आरोप अन्सारी यांनी केला आहे.
याच पार्श्वभूमीवर सामाजिक कार्यकर्ते तथा पत्रकार अहमद अली अन्सारी यांनी 10 ऑगस्ट 2026 पासून तिसऱ्यांदा आमरण उपोषण करण्याचा निर्णय जाहीर केला आहे. या आंदोलनामुळे संबंधित बँक शाखेतील अधिकारी आणि सुरक्षा रक्षकांविरुद्ध प्रशासन व बँक व्यवस्थापन कोणती भूमिका घेते, याकडे नागरिकांचे लक्ष लागले आहे.
दरम्यान, या प्रकरणातील आरोपांबाबत भारतीय स्टेट बँकेच्या संबंधित शाखा प्रशासनाची अधिकृत भूमिका अद्याप समोर आलेली नाही.
