नाशिक | प्रतिनिधी
नाशिक जिल्ह्यातील पिंपळगाव टोलनाका परिसरात नाशिक ग्रामीण पोलिसांनी मोठी कारवाई करत सुमारे ५३५ किलो गांजा जप्त केला. जप्त करण्यात आलेल्या अंमली पदार्थाची अंदाजे किंमत ₹१ कोटींहून अधिक असल्याची माहिती पोलिसांनी दिली आहे.
या कारवाईदरम्यान गांजाची वाहतूक करणाऱ्या ट्रक चालकाला अटक करण्यात आली असून, संबंधित ट्रकही पोलिसांनी जप्त केला आहे.
प्राथमिक तपासानुसार, हा गांजा नेमका कुठून आणण्यात आला होता आणि कोणत्या ठिकाणी पोहोचवला जाणार होता, याचा शोध पोलीस घेत आहेत. तसेच या प्रकरणामागे आणखी कोणाचा सहभाग आहे का, याचाही तपास सुरू आहे.
अंमली पदार्थांविरोधात सुरू असलेल्या विशेष मोहिमेअंतर्गत नाशिक ग्रामीण पोलिसांनी केलेल्या या कारवाईमुळे अमली पदार्थांच्या तस्करीला मोठा धक्का बसल्याचे मानले जात आहे. पोलिसांकडून या प्रकरणाचा पुढील तपास सुरू आहे.
