कोल्हापूर | प्रतिनिधी
शिक्षकेतर कर्मचाऱ्यांच्या विविध प्रलंबित प्रशासकीय व सेवा विषयक प्रश्नांवर तातडीने निर्णय घेऊन आवश्यक मार्गदर्शन करावे, अशी मागणी कोल्हापूर जिल्हा शिक्षकेतर संघटनेच्या वतीने करण्यात आली. यासंदर्भातील निवेदन जिल्हा परिषद माध्यमिक शिक्षणाधिकारी सुवर्णा सावंत यांना नुकतेच सादर करण्यात आले.
संघटनेने शिक्षकेतर कर्मचाऱ्यांच्या जिव्हाळ्याच्या आठ प्रमुख मागण्या निवेदनाद्वारे मांडल्या. यामध्ये कार्यालयीन परिपत्रके अधिक स्पष्ट व समजण्यास सोपी करणे, बदलीनंतर सेवा प्रमाणपत्राबाबत सुस्पष्ट मार्गदर्शन देणे, वेतन देयकाच्या प्रतीसंदर्भातील सूचना स्पष्ट करणे, लिपिकांसाठी प्रशिक्षण कार्यशाळा आयोजित करणे, नाव बदलासंदर्भातील अधिकार स्पष्ट करणारे परिपत्रक जारी करणे, शिक्षक पदोन्नतीचे प्रलंबित प्रस्ताव तातडीने निकाली काढणे, वैद्यकीय बिलांबाबत स्पष्ट मार्गदर्शक सूचना देणे तसेच शिक्षकेतर संघटनांसोबत नियमित सहविचार सभा आयोजित करण्याची मागणी करण्यात आली.
संघटनेच्या मते, या मागण्यांवर सकारात्मक निर्णय झाल्यास शिक्षकेतर कर्मचाऱ्यांचे प्रशासकीय प्रश्न मार्गी लागण्यास मदत होईल आणि कार्यालयीन कामकाज अधिक सुसूत्र व गतिमान होईल.
निवेदन सादर करताना संघटनेचे अध्यक्ष बाबासाहेब पाटील, सचिव मनोहर जाधव, मार्गदर्शक बाबासो शेलार, राज्य महामंडळ उपाध्यक्ष श्रीधर गोंधळी, कार्याध्यक्ष संजय पाटील, हिशोब तपासणीस विक्रमसिंह शेलार, उपाध्यक्ष मारुती मुगुडकर, बजरंग देसाई, शहराध्यक्ष प्रशांत पोवार, गडहिंग्लज-चंदगड प्रतिनिधी अशपाक मुरसल, महेश देसाई, अशोक पाटील, शानाजी माने, अतुल ठाकूर, अमोल सदलगे, राजेंद्र कारदगे, सागर कुपले, सरदार एन. काळे यांच्यासह शिक्षकेतर कर्मचारी मोठ्या संख्येने उपस्थित होते.
