पुणे प्रतिनिधी
पुण्यातील शिवणे प्रभाग क्रमांक ३३ मधील एका गृहनिर्माण सोसायटीमध्ये नागरिकांची पूर्वपरवानगी न घेता स्मार्ट मीटर बसवण्याचा प्रयत्न झाल्याचा आरोप करण्यात आला आहे. या प्रकाराविरोधात नगरसेविका अनिताताई इंगळे यांनी महावितरण कार्यालयात ठिय्या आंदोलन करत संबंधित अधिकाऱ्यांकडे तीव्र नाराजी व्यक्त केली.
मिळालेल्या माहितीनुसार, महावितरणचे कर्मचारी स्मार्ट मीटर बसवण्यासाठी सोसायटीमध्ये पोहोचले. मात्र, याबाबत नागरिकांना किंवा सोसायटी प्रशासनाला कोणतीही पूर्वसूचना देण्यात आली नसल्याचा दावा स्थानिकांनी केला. त्यामुळे रहिवाशांनी संताप व्यक्त करत नगरसेविका अनिताताई इंगळे यांच्याशी संपर्क साधला.
घटनेची माहिती मिळताच अनिताताई इंगळे यांनी कार्यकर्त्यांसह महावितरण कार्यालय गाठून अधिकाऱ्यांना जाब विचारला आणि कार्यालयातच ठिय्या आंदोलन सुरू केले. स्मार्ट मीटरबाबत नागरिकांच्या मनातील शंका दूर कराव्यात, वाढीव वीजबिलांबाबत पारदर्शक भूमिका घ्यावी आणि कोणतीही सक्ती करू नये, अशी मागणी त्यांनी केली.
यावेळी बोलताना अनिताताई इंगळे म्हणाल्या, “नागरिकांना विश्वासात न घेता स्मार्ट मीटर बसवण्याचा प्रकार योग्य नाही. आधीच वाढीव वीजबिलांमुळे सर्वसामान्य नागरिक त्रस्त आहेत. त्यांच्या शंकांचे समाधान न करता जबरदस्तीने मीटर बसवले, तर यापेक्षाही तीव्र आंदोलन करण्यात येईल. कोणत्याही नागरिकावर अन्याय होऊ देणार नाही.”
दरम्यान, आंदोलनानंतर महावितरणच्या अधिकाऱ्यांनी नागरिकांच्या शंकांचे निरसन करूनच पुढील प्रक्रिया राबविण्याचे आश्वासन दिल्याची माहिती देण्यात आली. या आंदोलनात शिवणे परिसरातील नागरिक आणि कार्यकर्ते मोठ्या संख्येने सहभागी झाले.
