📰 सारथी महाराष्ट्राचा न्यूज | नांदेड | प्रतिनिधी
महाराष्ट्रातील लोकनेते स्व. अजितदादा पवार यांच्या जयंतीनिमित्त २२ जुलै रोजी त्यांच्या शासकीय निवासस्थान असलेल्या ‘देवगिरी’ला राष्ट्रीय स्मारकाचा दर्जा देण्यात यावा, अशी मागणी राष्ट्रवादी काँग्रेसचे प्रदेश संघटक सचिव डॉ. उत्तम सोनकांबळे यांनी केली आहे. यासंदर्भातील निवेदन जिल्हाधिकाऱ्यांमार्फत मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्र्यांकडे सादर करण्यात आले.
निवेदनात म्हटले आहे की, स्व. अजितदादा पवार यांनी सामाजिक, राजकीय, शैक्षणिक, सांस्कृतिक, कृषी आणि सिंचन क्षेत्रात उल्लेखनीय योगदान दिले. शिव-शाहू-फुले-आंबेडकर यांच्या विचारांचा वारसा जपत सर्वसामान्यांच्या जीवनात सकारात्मक बदल घडविण्यासाठी त्यांनी सातत्याने कार्य केले.
‘देवगिरी’ या शासकीय निवासस्थानातून त्यांनी उपमुख्यमंत्री म्हणून अनेक लोकहिताचे निर्णय घेतले. त्यामुळे या निवासस्थानाला त्यांच्या कार्याच्या स्मृती जपणारे राष्ट्रीय स्मारक घोषित करून तेथे त्यांच्या जीवनकार्य, लोकहिताच्या योजना आणि सामाजिक योगदानाचे संग्रहालय (म्युझियम) उभारण्यात यावे, अशी मागणी डॉ. सोनकांबळे यांनी निवेदनाद्वारे केली आहे.
स्व. अजितदादा पवार यांच्या जयंतीदिनी, २२ जुलै रोजी हा निर्णय जाहीर करून त्यांच्या कार्याला अभिवादन करावे, अशी अपेक्षाही निवेदनात व्यक्त करण्यात आली आहे.
यावेळी राष्ट्रवादी काँग्रेसच्या महिला नेत्या ॲड. नाज परवीन शेख, राष्ट्रवादी युवती आघाडीच्या ममता उत्तमराव सोनकांबळे तसेच अक्षय सोनकांबळे उपस्थित होते.
