📰 सारथी महाराष्ट्राचा न्यूज | येवला | प्रतिनिधी :
येवला-मनमाड महामार्गावरील विसापूर फाट्याजवळ झालेल्या भीषण अपघातात दुचाकीस्वाराचा जागीच मृत्यू झाला असून, अन्य दोन जण गंभीर जखमी झाले आहेत. अज्ञात वाहनाने पाठीमागून पल्सर मोटरसायकलला जोरदार धडक दिल्याने हा अपघात झाल्याची प्राथमिक माहिती आहे.
मिळालेल्या माहितीनुसार, संबंधित व्यक्ती पल्सर मोटरसायकल क्रमांक (MH-15-KR-4763) वरून येवला-मनमाड रस्त्याने प्रवास करत होते. विसापूर फाट्याजवळ पोहोचले असता पाठीमागून भरधाव वेगाने आलेल्या अज्ञात वाहनाने दुचाकीला जोरदार धडक दिली.
धडक इतकी भीषण होती की, दुचाकीवरील चालक व प्रवासी रस्त्यावर दूरवर फेकले गेले. या अपघातात दुचाकी चालकाचा गंभीर दुखापतीमुळे घटनास्थळीच मृत्यू झाला, तर मोटरसायकलवर बसलेले अन्य दोन जण गंभीर जखमी झाले आहेत.
अपघातानंतर अज्ञात वाहनचालक घटनास्थळावरून पसार झाला. घटनेची माहिती मिळताच स्थानिक नागरिकांनी तातडीने मदतीसाठी धाव घेतली. पोलिसांनीही घटनास्थळी दाखल होत जखमींना उपचारासाठी जवळच्या शासकीय रुग्णालयात दाखल केले.
जखमींची प्रकृती चिंताजनक असल्याचे सांगण्यात येत असून, फरार वाहनचालकाचा शोध घेण्यासाठी पोलिसांकडून तपास सुरू करण्यात आला आहे.
