📰 सारथी महाराष्ट्राचा न्यूज | पुणे | प्रतिनिधी
महाराष्ट्राचे माजी उपमुख्यमंत्री व ऑलिम्पिक असोसिएशनचे माजी अध्यक्ष दिवंगत अजितदादा पवार यांच्या जयंतीनिमित्त २२ जुलै रोजी पुणे ते बारामती राष्ट्रीय व राज्यस्तरीय सायकल स्पर्धेचे आयोजन करण्यात आले आहे.
सायकलिंग फेडरेशन ऑफ इंडिया, नवी दिल्ली आणि सायकल असोसिएशन ऑफ महाराष्ट्र यांच्या सहकार्याने पुणे जिल्हा शिक्षण मंडळाच्या वतीने या स्पर्धेचे आयोजन करण्यात आले आहे. स्पर्धेत सहभागी होऊ इच्छिणाऱ्या सायकलपटूंनी नावनोंदणी करावी, असे आवाहन संस्थेचे उपाध्यक्ष राजेंद्र घाडगे आणि मानद सचिव अॅड. संदीप कदम यांनी केले आहे.
या स्पर्धेचे हे दहावे वर्ष असून, चार विविध गटांमध्ये स्पर्धा घेण्यात येणार आहे. यामध्ये पुरुषांसाठी १२२ किलोमीटरची पुणे ते बारामती राष्ट्रीय व राज्यस्तरीय स्पर्धा, सासवड ते बारामती ही ८५ किलोमीटरची पुरुषांसाठी खुली राज्यस्तरीय एमटीबी स्पर्धा तसेच महिलांसाठी माळेगाव ते बारामती ही १५ किलोमीटरची राष्ट्रीय स्पर्धा आयोजित करण्यात आली आहे.
प्रत्येक गटातील प्रथम तीन क्रमांक पटकावणाऱ्या स्पर्धकांना रोख पारितोषिक व स्मृतिचिन्ह देऊन गौरविण्यात येणार आहे. तसेच दिवे घाट प्रथम पार करणाऱ्या स्पर्धकाला राज्य व राष्ट्रीय स्तरावर ‘घाटाचा राजा’ हा मानाचा पुरस्कार प्रदान करण्यात येणार आहे.
या स्पर्धेत देशभरातील राष्ट्रीय व आंतरराष्ट्रीय स्तरावरील सुमारे ४५० स्पर्धक सहभागी होत असतात. स्पर्धेसाठी कोणतेही प्रवेश शुल्क आकारले जाणार नसून इच्छुक स्पर्धकांनी दिलेला क्यूआर कोड स्कॅन करून नावनोंदणी करावी, असे आवाहन करण्यात आले आहे.
अधिक माहितीसाठी सायकलिंग असोसिएशन ऑफ महाराष्ट्राचे सचिव संजय साठे (७९७२१८९६७०) आणि डॉ. योगेश पवार (९८५०९५२७८७) यांच्याशी संपर्क साधण्याचे आवाहन अॅड. संदीप कदम यांनी केले आहे.
