परतवाडा | प्रतिनिधी
अमरावती जिल्ह्यात अंमली पदार्थांविरोधात जनजागृती करण्यासाठी ‘ऑपरेशन कवच’ या विशेष मोहिमेअंतर्गत परतवाडा व अचलपूर येथे पोलिसांच्या वतीने जनजागृती रॅलीचे आयोजन करण्यात आले.
ग्रामीण पोलीस अधीक्षक निकेतन कदम यांच्या मार्गदर्शनाखाली परतवाडा पोलीस ठाण्याचे पोलीस निरीक्षक अजय आकरे यांच्या नेतृत्वाखाली ही रॅली काढण्यात आली. रॅलीमध्ये पोलीस अधिकारी, कर्मचारी, शाळेतील विद्यार्थी, शिक्षक-शिक्षिका तसेच विविध विभागांतील कर्मचारी मोठ्या संख्येने सहभागी झाले.
यावेळी अचलपूर विधानसभा मतदारसंघाचे आमदार प्रविणभाऊ तायडे यांनीही रॅलीत सहभागी होत नागरिकांना अंमली पदार्थांच्या व्यसनामुळे होणाऱ्या दुष्परिणामांची माहिती दिली. समाजाने कायदा व सुव्यवस्थेचे पालन करत व्यसनमुक्त जीवन स्वीकारावे, असे आवाहन त्यांनी केले.
“नशाला नकार, जीवनाला स्वीकार” हा संदेश देत परतवाडा शहरातील विविध मार्गांवरून रॅली काढण्यात आली. नागरिकांमध्ये व्यसनमुक्तीबाबत जनजागृती करण्यासाठी विविध घोषणाही देण्यात आल्या.
दरम्यान, अचलपूर पोलीस ठाण्याच्या वतीनेही ‘ऑपरेशन कवच’ अंतर्गत स्वतंत्र जनजागृती रॅलीचे आयोजन करण्यात आले. अंमली पदार्थांच्या वाढत्या विळख्यातून युवकांना दूर ठेवण्यासाठी आणि समाजात जागरूकता निर्माण करण्याच्या उद्देशाने ही मोहीम राबविण्यात येत असल्याचे पोलिसांनी सांगितले.
