📰 सारथी महाराष्ट्राचा न्यूज | अहेरी | प्रतिनिधी
अहेरी पोलीस ठाण्याच्या हद्दीत अवैध दारू वाहतुकीविरोधात पोलिसांनी धडक कारवाई करत आलापल्ली परिसरातून ८ लाख २० हजार रुपयांचा मुद्देमाल जप्त केला आहे. या कारवाईत अवैध देशी दारूचा साठा आणि वाहतुकीसाठी वापरण्यात आलेली स्विफ्ट डिझायर कार जप्त करण्यात आली असून, आरोपी चालक फरार झाला आहे.
पोलिसांना १८ जुलै २०२६ रोजी पहाटे गुप्त बातमीदारामार्फत आलापल्ली परिसरातून अवैध दारूची वाहतूक होत असल्याची माहिती मिळाली होती. त्यानुसार मौजा आलापल्लीच्या पूर्वेस सुमारे सात किलोमीटर अंतरावर सापळा रचण्यात आला.
दरम्यान, संशयित पांढऱ्या रंगाची स्विफ्ट डिझायर कार (क्र. एमएच-०४ एफझेड-५०९२) अडवून पंचांसमक्ष झडती घेतली असता, वाहनात ‘रॉकेट संत्रा’ कंपनीच्या ९० मिली क्षमतेच्या देशी दारूच्या ४ हजार बाटल्या (४० बॉक्स) आढळून आल्या.
या कारवाईत सुमारे ३ लाख २० हजार रुपयांची अवैध देशी दारू आणि ५ लाख रुपयांची स्विफ्ट डिझायर कार असा एकूण ८ लाख २० हजार रुपयांचा मुद्देमाल जप्त करण्यात आला.
पोलिसांची चाहूल लागताच आरोपी चालक घटनास्थळावरून फरार झाला. याप्रकरणी पोलीस हवालदार महेश सडमेक यांच्या फिर्यादीवरून अहेरी पोलीस ठाण्यात गुन्हा क्रमांक २२१/२०२६ दाखल करण्यात आला असून, महाराष्ट्र दारूबंदी कायद्यान्वये पुढील कारवाई सुरू आहे.
या प्रकरणाचा पुढील तपास सहाय्यक पोलीस निरीक्षक मंगेश वळवी यांच्या मार्गदर्शनाखाली सुरू असून, फरार आरोपीचा शोध पोलीस घेत आहेत.
