आजरा | प्रतिनिधी :
आजरा येथील नामांकित व्यंकटराव हायस्कूलमध्ये शैक्षणिक वर्ष २०२५-२६ मधील विविध परीक्षांमध्ये उल्लेखनीय यश संपादन केलेल्या गुणवंत विद्यार्थ्यांचा पारितोषिक वितरण सोहळा उत्साहपूर्ण वातावरणात संपन्न झाला. यावेळी एसएससी, इयत्ता ५ वी व ८ वी शिष्यवृत्ती परीक्षा तसेच NMMS परीक्षेत यश मिळवलेल्या विद्यार्थ्यांचा मान्यवरांच्या हस्ते गौरव करण्यात आला.
कार्यक्रमाच्या अध्यक्षस्थानी आजरा महाल शिक्षण मंडळाचे उपाध्यक्ष के. जी. पटेकर होते. त्यांनी ग्रामीण भागातील विद्यार्थ्यांनी सातत्यपूर्ण मेहनतीच्या बळावर मिळवलेले यश कौतुकास्पद असल्याचे सांगत विद्यार्थ्यांचे अभिनंदन केले.
कार्यक्रमाची सुरुवात सरस्वती पूजनाने झाली. प्राचार्य संजयकुमार पाटील यांनी प्रास्ताविक करत शाळेच्या गुणवत्तापूर्ण शैक्षणिक परंपरेचा गौरव केला आणि विद्यार्थ्यांना यशाची परंपरा कायम राखण्याचे आवाहन केले.
एसएससी गुणवंतांचा गौरव
मार्च २०२६ च्या एसएससी परीक्षेतील गुणवंत विद्यार्थ्यांचा सत्कार करण्यात आला.
- प्रथम : प्रणव भगवान पाटील
- द्वितीय : जुवेरीया समीर शेख
- तृतीय : सिमरन भिकाजी पाटील
- चतुर्थ : शलाका ओमकार गिरी
- पाचवा : साक्षी शिवाजी राणे
याशिवाय प्रेम रमेश येसणे यांचा विशेष सत्कार करण्यात आला.
मराठी, हिंदी, इंग्रजी, गणित, विज्ञान, समाजशास्त्र, संस्कृत, चित्रकला, शारीरिक शिक्षण या विषयांतील गुणवंत विद्यार्थी तसेच इयत्ता ५ वी ते ९ वीमधील प्रथम क्रमांक मिळवलेल्या विद्यार्थ्यांचाही गौरव करण्यात आला.
शिष्यवृत्ती व NMMS परीक्षेतील यश
इयत्ता ५ वी शिष्यवृत्ती परीक्षेत पात्र ठरलेले स्वरा मोटे व शौर्य आजगेकर, तसेच इयत्ता ८ वी शिष्यवृत्ती व NMMS परीक्षेत यशस्वी ठरलेले वेदांग शिंदे, गझल मुल्ला, सिद्धी होरटे आणि तनिष्क देसाई यांचा सत्कार करण्यात आला.
आजरा केंद्रात प्रथम क्रमांक मिळवणाऱ्या खादिजा मुल्ला, गतिमा अडकूरकर, संदेश देसाई आणि सिद्धेश गुरव यांचाही विशेष गौरव करण्यात आला.
मार्गदर्शक शिक्षकांचा सन्मान
विद्यार्थ्यांच्या यशामागे योगदान देणाऱ्या सर्व शिक्षक व शिक्षिकांचा तसेच माजी शिक्षक व दाते ए. के. पावले आणि एस. जी. इंजल यांचा विशेष सन्मान करण्यात आला. त्यांनी विद्यार्थ्यांना उज्ज्वल भविष्यासाठी शुभेच्छा दिल्या.
कार्यक्रमाचे सूत्रसंचालन रामदास होरटे यांनी केले, तर आभार सौ. ए. डी. पाटील यांनी मानले. कार्यक्रमाचे नियोजन सौ. व्ही. जे. शेलार, सौ. एस. डी. इलगे आणि सर्व शिक्षकेतर कर्मचाऱ्यांनी केले.
या सोहळ्यास आजरा महाल शिक्षण मंडळाचे पदाधिकारी, संचालक, माजी शिक्षक, हितचिंतक, पालक आणि नागरिक मोठ्या संख्येने उपस्थित होते. गुणवंत विद्यार्थ्यांच्या यशाबद्दल उपस्थितांनी त्यांचे अभिनंदन करून पुढील शैक्षणिक वाटचालीस शुभेच्छा दिल्या.
