आजरा | प्रतिनिधी
आजरा येथील होतकरू विद्यार्थी सोहम सुनील चव्हाण याने देशातील अत्यंत स्पर्धात्मक मानल्या जाणाऱ्या NEET आणि JEE Main या दोन्ही राष्ट्रीय स्तरावरील परीक्षांमध्ये उल्लेखनीय यश संपादन करून आजरा शहराच्या शिरपेचात मानाचा तुरा खोवला आहे.
नुकत्याच जाहीर झालेल्या निकालानुसार, सोहमने NEET परीक्षेत 584 गुण मिळवले असून JEE Main परीक्षेत 97.29 पर्सेंटाईल प्राप्त केले आहे. वैद्यकीय आणि अभियांत्रिकी या दोन्ही क्षेत्रांतील प्रतिष्ठित प्रवेश परीक्षांमध्ये एकाचवेळी उत्कृष्ट कामगिरी करून त्याने आपल्या गुणवत्तेची छाप पाडली आहे.
सोहमचे प्राथमिक व माध्यमिक शिक्षण रोझरी इंग्लिश हायस्कूल, आजरा येथे झाले. त्यानंतर त्याने आजरा महाविद्यालय, आजरा येथून बारावीचे शिक्षण पूर्ण केले. लहानपणापासूनच अभ्यासात सातत्य आणि मेहनतीच्या बळावर त्याने हे यश संपादन केले आहे.
सोहम हा आजरा येथील ‘कांचन मेडिकल स्टोअर्स’चे संचालक श्री. सुनील चव्हाण यांचा सुपुत्र आहे. त्याच्या या यशामुळे चव्हाण कुटुंबासह आजरा शहराचा गौरव वाढला आहे.
या उल्लेखनीय यशाबद्दल आजरा महाविद्यालयाचे प्राध्यापक, रोझरी इंग्लिश हायस्कूलचे शिक्षक, मित्रपरिवार तसेच आजरा परिसरातील नागरिकांकडून सोहम चव्हाण याच्यावर अभिनंदनाचा वर्षाव होत असून त्याच्या उज्ज्वल भवितव्यासाठी शुभेच्छा दिल्या जात आहेत.
