मारेगाव | प्रतिनिधी :
मारेगाव-वणी महामार्गालगत असलेल्या शासनमान्य मद्यविक्री केंद्रातून दररोज रात्री चारचाकी वाहनाद्वारे बोटोनी सर्कल परिसरात अवैध दारू विक्रीसाठी मद्याची वाहतूक होत असल्याचा संशय नागरिकांनी व्यक्त केला आहे. या प्रकाराची सखोल चौकशी करून वस्तुस्थिती समोर आणावी, अशी मागणी स्थानिक नागरिकांनी प्रशासनाकडे केली आहे.
स्थानिकांच्या म्हणण्यानुसार, संबंधित चारचाकी वाहन नियमितपणे मारेगाव पोलीस ठाण्यासमोरून जात असल्याचा दावा केला जात आहे. त्यामुळे या कथित वाहतुकीची पोलिसांना माहिती नव्हती का, असा प्रश्न नागरिक उपस्थित करत आहेत. हा प्रकार नुकताच सुरू झाला आहे की यापूर्वीपासून सुरू होता, याचीही चौकशी व्हावी, अशी मागणी होत आहे.
दरम्यान, बोटोनी सर्कल परिसरात अवैध दारू विक्री होत असल्याच्या तक्रारी यापूर्वीही ग्रामस्थ व महिलांनी मारेगाव पोलीस ठाण्यात निवेदनाद्वारे केल्याची माहिती समोर आली आहे.
या पार्श्वभूमीवर संबंधित प्रशासनाने या प्रकरणाची निष्पक्ष चौकशी करून सत्य परिस्थिती नागरिकांसमोर मांडावी आणि अवैध प्रकार आढळल्यास संबंधितांवर कायदेशीर कारवाई करावी, अशी मागणी परिसरातील नागरिकांकडून करण्यात येत आहे.
