नांदेड | विशेष प्रतिनिधी
नांदेड येथील विष्णूपुरीस्थित डॉ. शंकरराव चव्हाण शासकीय वैद्यकीय महाविद्यालय व रुग्णालयाने (GMCH) अत्यंत गुंतागुंतीची मूत्रपिंड शस्त्रक्रिया यशस्वी करून पुन्हा एकदा शासकीय आरोग्य सेवेची गुणवत्ता अधोरेखित केली आहे. हिमायतनगर तालुक्यातील ५३ वर्षीय रुग्णावर तज्ज्ञ डॉक्टरांच्या पथकाने अत्यंत जोखमीची उपचार प्रक्रिया यशस्वीपणे पार पाडत त्यांना नवजीवन दिले.
दोन्ही किडन्या निकामी; जीव धोक्यात
रुग्णाची दोन्ही मूत्रपिंडे जवळपास निकामी झाली होती. एका किडनीचे कार्य ९० टक्क्यांपर्यंत बंद झाले होते, तर लघवीच्या मार्गातील अडथळ्यामुळे (Obstructive Uropathy) दोन्ही किडन्यांनी काम करणे थांबवले होते. शरीरातील पोटॅशियमचे प्रमाण धोकादायकरीत्या वाढल्याने हृदयविकाराचा झटका येण्याची शक्यता निर्माण झाली होती.
रुग्णाची प्रकृती गंभीर झाल्याने त्यांना तातडीने विष्णूपुरी येथील शासकीय रुग्णालयात दाखल करण्यात आले.
डॉक्टरांचा तातडीचा निर्णय ठरला जीवनदायी
रुग्णालयाचे अधिष्ठाता डॉ. सुधीर देशमुख आणि वैद्यकीय अधीक्षक डॉ. विजय कन्नाके यांच्या मार्गदर्शनाखाली विविध विभागातील डॉक्टरांनी समन्वय साधून उपचार सुरू केले.
सर्वप्रथम किडनीविकार तज्ज्ञ डॉ. कपिल मोरे आणि डॉ. मोहन भंडारे यांनी रुग्णाची प्रकृती स्थिर करण्यासाठी तातडीने डायलिसिस केले. त्यानंतर शस्त्रक्रिया विभागाचे डॉ. विद्यासागर केकळकर आणि डॉ. संदीप चव्हाण यांनी अत्यंत कौशल्याने गुंतागुंतीची शस्त्रक्रिया यशस्वीरीत्या पार पाडली.
विविध विभागांचा उत्कृष्ट समन्वय
उपचार प्रक्रियेदरम्यान मेडिसिन विभागाच्या प्रमुख प्रा. डॉ. शीतल राठोड, डॉ. सूरज चव्हाण, डॉ. फलक रऊफ आणि डॉ. आकाश पवार यांनी आवश्यक तपासण्या व औषधोपचार केले. शस्त्रक्रियेदरम्यान भूलतज्ज्ञ डॉ. देविदास बेंडेवाड, डॉ. आयुषी पायघन आणि डॉ. अभिजीत कदम यांनी महत्त्वपूर्ण भूमिका बजावली.
शासकीय रुग्णालयांची गुणवत्ता पुन्हा अधोरेखित
या यशस्वी शस्त्रक्रियेबाबत अधिष्ठाता डॉ. सुधीर देशमुख यांनी सांगितले की, “रुग्णाची परिस्थिती अत्यंत गंभीर होती. अशा प्रकारची जोखमीची शस्त्रक्रिया शासकीय रुग्णालयात यशस्वी होणे हे येथील तज्ज्ञ डॉक्टरांचे कौशल्य, आधुनिक सुविधा आणि टीमवर्कचे उत्कृष्ट उदाहरण आहे.”
रुग्ण प्रकृतीत सुधारणा; नातेवाईकांकडून डॉक्टरांचे आभार
यशस्वी शस्त्रक्रिया आणि वेळेवर करण्यात आलेल्या डायलिसिसमुळे रुग्णाच्या प्रकृतीत झपाट्याने सुधारणा झाली असून ते आता धोक्याबाहेर आहेत. कुटुंबातील प्रमुख व्यक्तीला नवजीवन मिळाल्याने त्यांच्या नातेवाईकांनी रुग्णालयातील डॉक्टर, परिचारिका आणि आरोग्य कर्मचाऱ्यांचे मनःपूर्वक आभार व्यक्त केले.
या यशस्वी उपचारामुळे नांदेडच्या शासकीय रुग्णालयातील तज्ज्ञ वैद्यकीय सेवा आणि आधुनिक उपचार पद्धतींवर नागरिकांचा विश्वास अधिक दृढ झाला आहे.
