धारासूर | प्रतिनिधी :
गंगाखेड तालुक्यातील मौजे धारासूर येथील प्राचीन, ऐतिहासिक व राज्य संरक्षित गुप्तेश्वर मंदिराच्या जतन, संवर्धन आणि जीर्णोद्धाराच्या कामासाठी गुप्तेश्वर मंदिर बचाव संघर्ष समितीच्या वतीने महाराष्ट्राचे उपमुख्यमंत्री एकनाथ शिंदे यांची ठाणे येथील निवासस्थानी भेट घेऊन निवेदन सादर करण्यात आले.
निवेदनामध्ये मंदिराच्या जीर्णोद्धारादरम्यान मूळ दगडी वास्तूला कोणताही धोका निर्माण होऊ नये, तसेच नक्षीकाम, गाभारा, खांब, खुंटी आणि इंटेलॉकिंग तंत्राचा वापर करताना मंदिराचे ऐतिहासिक व स्थापत्यवैभव अबाधित राखण्यात यावे, अशी मागणी करण्यात आली आहे.
दि. १६ जुलै २०२६ रोजी गुप्तेश्वर मंदिर बचाव संघर्ष समितीच्या वतीने हे निवेदन देण्यात आले. यावेळी समितीचे सदस्य निवृत्ती कदम, जयराम कदम, अशोक शिंदे तसेच धारासूर येथील ग्रामस्थ उपस्थित होते. समितीच्या वतीने उपमुख्यमंत्री एकनाथ शिंदे यांना परभणी जिल्ह्याच्या ऐतिहासिक वारशाचे प्रतीक असलेल्या गुप्तेश्वर मंदिराची प्रतिमाही भेट देण्यात आली.
यावेळी “गुप्तेश्वर भगवान की जय” अशा घोषणांनी परिसर दुमदुमून गेला. तसेच उपमुख्यमंत्री एकनाथ शिंदे यांनी लवकरच गुप्तेश्वर मंदिराला भेट देऊन जतन, संवर्धन आणि जीर्णोद्धाराच्या कामाची प्रत्यक्ष पाहणी करावी, अशी विनंतीही समितीने केली.
धारासूरच्या ऐतिहासिक, सांस्कृतिक आणि धार्मिक वारशाचे प्रतीक असलेल्या गुप्तेश्वर मंदिराचे संवर्धन करण्यासाठी शासनाने विशेष लक्ष घालावे, अशी अपेक्षा गुप्तेश्वर मंदिर बचाव संघर्ष समितीने व्यक्त केली आहे.
