धारासूर | प्रतिनिधी :
वैद्यकीय शिक्षणासाठी महत्त्वाची मानली जाणारी NEET 2026 परीक्षेत गंगाखेड तालुक्यातील धारासूर परिसरातील विद्यार्थ्यांनी उल्लेखनीय यश संपादन केले आहे. या यशाबद्दल जय मल्हार मित्र मंडळ व समस्त ग्रामस्थांच्या वतीने गुणवंत विद्यार्थ्यांचा सत्कार व गौरव समारंभ आयोजित करण्यात आला आहे.
या परीक्षेत मंजुषा महादेव भुजबळ हिने ७२० पैकी ५८२ गुण मिळवत उल्लेखनीय यश मिळवले आहे. तसेच कृष्णा अरुणराव जाधव याने ५४५ गुण, तर राजश्री विक्रम (भैय्या) जाधव हिने ५२९ गुण मिळवत NEET परीक्षा उत्तीर्ण केली आहे.
विशेषतः मंजुषा भुजबळ हिने मिळवलेल्या ५८२ गुणांमुळे तिचे सर्व स्तरांतून कौतुक होत असून, परभणी जिल्ह्यातील मुलींमध्ये तिने उल्लेखनीय कामगिरी केल्याबद्दल तिच्यावर अभिनंदनाचा वर्षाव होत आहे.
ग्रामीण भागातील विद्यार्थ्यांनी प्रतिकूल परिस्थितीवर मात करत मिळवलेले हे यश इतर विद्यार्थ्यांसाठी प्रेरणादायी ठरत असून, धारासूर गावाच्या शैक्षणिक लौकिकातही भर पडली आहे.
या गुणवंत विद्यार्थ्यांचा बुधवार, दि. २२ जुलै २०२६ रोजी सायंकाळी ६ वाजता सत्कार व गौरव समारंभ आयोजित करण्यात आला आहे. या कार्यक्रमास ग्रामस्थांनी मोठ्या संख्येने उपस्थित राहून विद्यार्थ्यांचा गौरव करावा, असे आवाहन जय मल्हार मित्र मंडळ व समस्त ग्रामस्थांच्या वतीने करण्यात आले आहे.
