पुणे | प्रतिनिधी
पुणे जिल्हा शिक्षण मंडळाचे तथा महाराष्ट्र ऑलिम्पिक असोसिएशनचे माजी अध्यक्ष आणि राज्याचे माजी उपमुख्यमंत्री अजितदादा पवार यांच्या जयंतीनिमित्त आयोजित करण्यात आलेल्या दहाव्या पुणे–बारामती राष्ट्रीय व राज्यस्तरीय सायकल स्पर्धेच्या पूर्वतयारी बैठकीचे आयोजन अण्णासाहेब मगर महाविद्यालयात करण्यात आले.
बुधवार, २२ जुलै २०२६ रोजी होणारी ही स्पर्धा सायकलिंग फेडरेशन ऑफ इंडिया आणि सायकलिंग असोसिएशन ऑफ महाराष्ट्र यांच्या मान्यतेने पुणे जिल्हा शिक्षण मंडळाच्या वतीने आयोजित करण्यात आली आहे. स्पर्धेचे उद्घाटन सकाळी ९ वाजता हडपसर येथील ग्लायडिंग सेंटर येथे होणार असून तेथून स्पर्धेला प्रारंभ होईल.
यावर्षी स्पर्धेचे दहावे वर्ष असून ती चार गटांमध्ये होणार आहे. यामध्ये पुणे ते बारामती (१२२ किमी) पुरुष राष्ट्रीय व राज्यस्तरीय स्पर्धा, सासवड ते बारामती (८५ किमी) खुली एमटीबी राज्यस्तरीय स्पर्धा, तसेच माळेगाव ते बारामती (१५ किमी) महिलांची राष्ट्रीय सायकल स्पर्धा आयोजित करण्यात आली आहे.
पूर्वतयारी बैठकीस हडपसरचे आमदार चेतन तुपे पाटील, पुणे जिल्हा शिक्षण मंडळाचे मानद सचिव अॅड. संदीप कदम, राष्ट्रवादी काँग्रेसचे राज्य उपाध्यक्ष सुरेश घुले, माजी उपमहापौर निलेश मगर, डॉ. शंतनू जगदाळे, अमर तुपे, संतोष सरोदे, अजित घुले, फारूक इनामदार, ओंकार कामठे, भरत झांबरे, वैष्णवी सातव, सुजाता कटके, सोनाली घुले, शबाना शेख, वामन घाडगे, योगेश सूर्यवंशी, मनोज घुले, कलेश्वर घुले, संजय घुले यांच्यासह विविध शैक्षणिक संस्थांचे प्राचार्य व मान्यवर उपस्थित होते.
यावेळी आमदार चेतन तुपे पाटील यांनी ही स्पर्धा हडपसरच्या नावलौकिकात भर घालणारी असून भविष्यात तिचा विस्तार जागतिक स्तरावर करण्यासाठी प्रयत्न करावेत, असे मत व्यक्त केले.
पुणे जिल्हा शिक्षण मंडळाचे मानद सचिव अॅड. संदीप कदम यांनी सांगितले की, या स्पर्धेत देशभरातील ४०० ते ४५० राष्ट्रीय व आंतरराष्ट्रीय सायकलपटू सहभागी होणार आहेत. विजेत्यांना एकूण सहा लाख रुपयांची रोख पारितोषिके आणि स्मृतिचिन्हे प्रदान करण्यात येणार आहेत. तसेच दिवे घाट प्रथम पार करणाऱ्या स्पर्धकास “घाटाचा राजा” हा विशेष पुरस्कार दिला जाणार आहे.
याच दिवशी शनिवारवाडा ते हडपसर दरम्यान जनजागृतीपर सायकल रॅलीचेही आयोजन करण्यात आले आहे. पर्यावरण संरक्षण, प्रदूषण नियंत्रण, स्वच्छता आणि वाहतूक जनजागृतीचा संदेश देणाऱ्या या रॅलीत ३,००० ते ३,५०० विद्यार्थी, शिक्षक, ज्येष्ठ नागरिक आणि प्रतिष्ठित नागरिक सहभागी होणार असल्याची माहिती देण्यात आली.
बैठकीचे प्रास्ताविक प्राचार्य डॉ. नितीन घोरपडे यांनी केले. सूत्रसंचालन डॉ. प्रशांत मुळे यांनी केले, तर अमर तुपे यांनी आभार मानले.
