पुणे | प्रतिनिधी
पुणे–सोलापूर महामार्गावरील वाढती वाहतूक कोंडी लक्षात घेऊन राज्य सरकारने महत्त्वाचा निर्णय घेतला आहे. हडपसर ते यवत दरम्यान 31.50 किलोमीटर लांबीचा उन्नत (Elevated) सहापदरी महामार्ग उभारण्यात येणार असून, हा देशातील दुसऱ्या क्रमांकाचा सर्वात लांब उन्नत महामार्ग ठरणार आहे. या प्रकल्पामुळे मांजरी फाटा, लोणी काळभोर, थेऊर फाटा, उरूळी कांचन आणि परिसरातील वाहतूक कोंडी मोठ्या प्रमाणात कमी होण्याची अपेक्षा आहे.
महाराष्ट्र राज्य पायाभूत सुविधा विकास महामंडळ (MSIDC) या प्रकल्पाची अंमलबजावणी करणार असून, सध्या चौपदरी असलेल्या पुणे–सोलापूर महामार्गाचे सहापदरीकरण करण्यात येणार आहे. यासाठी 47.25 हेक्टर जमिनीचे भूसंपादन आवश्यक असून, प्रकल्पाचा अंदाजित खर्च ₹5,260 कोटी इतका आहे.
वाहतूक कोंडीतून मोठा दिलासा
सध्या या मार्गावर दररोज सुमारे 43,640 वाहने धावतात. भविष्यात हा आकडा 1.06 लाख प्रवासी वाहनांपर्यंत पोहोचण्याचा अंदाज आहे. नवीन उन्नत महामार्गाची सुरुवातीची क्षमता प्रतिदिन 30 हजार वाहनांची असणार असून, वाढत्या वाहतुकीचा विचार करून प्रकल्पाची रचना करण्यात आली आहे.
या प्रकल्पामुळे मांजरी फाटा, कदमवाक वस्ती, लोणी काळभोर, थेऊर फाटा आणि उरूळी कांचन येथील वाहतूक कोंडी कमी होऊन प्रवास अधिक जलद आणि सुरक्षित होणार आहे.
असा असेल प्रकल्प
- हडपसर ते सहजपूरवाडी : 25 किमी लांबीचा सहापदरी उन्नत महामार्ग.
- हडपसर ते यवत : 31.50 किमी लांबीचा सहापदरी जमिनीवरील महामार्ग.
- हडपसर ते बाह्य वर्तुळाकार मार्ग (Ring Road) : 17.67 किमी लांबीची मेट्रो मार्गिका.
पुणे ठरणार उन्नत महामार्गांचे केंद्र
पुणे शहरातील वाढती लोकसंख्या आणि वाहतुकीचा ताण लक्षात घेऊन राज्यात मोठ्या प्रमाणावर पायाभूत सुविधा उभारल्या जात आहेत. पुणे–शिरूर दरम्यान देशातील सर्वात लांब उन्नत महामार्ग उभारला जात असून, त्यानंतर हडपसर–यवत हा देशातील दुसऱ्या क्रमांकाचा सर्वात लांब उन्नत महामार्ग ठरणार असल्याची माहिती महाराष्ट्र राज्य पायाभूत सुविधा विकास महामंडळाचे व्यवस्थापकीय संचालक ब्रिजेश दीक्षित यांनी दिली आहे.
या महत्त्वाकांक्षी प्रकल्पामुळे पुणे–सोलापूर महामार्गावरील प्रवास अधिक वेगवान, सुरक्षित आणि सुलभ होण्याची अपेक्षा व्यक्त केली जात आहे.
