नाशिक प्रतिनिधी | दि. १९ जुलै
नाशिक शहरातील अशोकस्तंभ परिसरातील एका आधाराश्रमातून तीन अल्पवयीन मुली बेपत्ता झाल्याची घटना समोर आली असून, या घटनेमुळे परिसरात खळबळ उडाली आहे. मुलींचा शोध घेण्यासाठी सरकारवाडा पोलिसांनी तातडीने शोधमोहीम सुरू केली आहे.
प्राथमिक माहितीनुसार, संबंधित तीनही मुली आधाराश्रमातून बाहेर पडल्याचे निदर्शनास आले. घटनेची माहिती मिळताच सरकारवाडा पोलिस ठाण्यात नोंद करण्यात आली असून, पोलिसांकडून सीसीटीव्ही फुटेजची तपासणी, परिसरातील चौकशी तसेच विविध पथकांच्या माध्यमातून मुलींचा शोध घेतला जात आहे.
या प्रकरणाचा सखोल तपास सुरू असून, मुलींचा लवकरात लवकर शोध लागावा यासाठी सर्वतोपरी प्रयत्न करण्यात येत आहेत.
दरम्यान, संबंधित मुलींबाबत कोणतीही माहिती मिळाल्यास नागरिकांनी तातडीने जवळच्या पोलिस ठाण्याशी किंवा सरकारवाडा पोलिसांशी संपर्क साधण्याचे आवाहन करण्यात आले आहे.
