प्रतिनिधी | कुरुंदवाड
कुरुंदवाड नगरपरिषदेसह सर्व शासकीय कार्यालयांमध्ये माजी उपमुख्यमंत्री अजितदादा अनंत पवार यांचे तेलचित्र लावून दरवर्षी २२ जुलै रोजी त्यांची जयंती साजरी करण्यात यावी, अशी मागणी कुरुंदवाड येथील अजितदादा पवार समर्थक व नागरिकांकडून करण्यात आली आहे.
नागरिकांच्या म्हणण्यानुसार, महाराष्ट्र शासनाने घेतलेल्या निर्णयानुसार सन २०२६ पासून अजितदादा पवार यांच्या जयंतीचा समावेश राष्ट्रपुरुष व थोर व्यक्तींच्या अधिकृत जयंती कार्यक्रमांमध्ये करण्यात आला आहे. त्यांच्या विकासाभिमुख कार्याची ही अधिकृत दखल असल्याचे नागरिकांनी नमूद केले आहे.
निवेदनात अजितदादा पवार यांनी सिंचन, पायाभूत सुविधा, उद्योग, शिक्षण, क्रीडा, ग्रामीण विकास आणि जनकल्याण यांसारख्या विविध क्षेत्रांत केलेल्या कामांचा उल्लेख करण्यात आला आहे. त्यांच्या निर्णयक्षम नेतृत्वामुळे राज्याच्या विकासाला नवी दिशा मिळाल्याचेही निवेदनात म्हटले आहे.
दरवर्षी २२ जुलै रोजी शासकीय स्तरावर त्यांच्या प्रतिमेस पुष्पहार अर्पण करून अभिवादन करण्यात येणार असल्याने, कुरुंदवाड नगरपरिषदेसह सर्व शासकीय कार्यालयांमध्ये त्यांचे तेलचित्र लावून जयंती साजरी करण्यात यावी, अशी मागणी करण्यात आली आहे.
दरम्यान, या मागणीकडे संबंधित प्रशासन काय भूमिका घेते, याकडे स्थानिक नागरिकांचे लक्ष लागले आहे.
