इंदापूर | प्रतिनिधी
आषाढी एकादशीच्या निमित्ताने सपकळवाडी येथील जिल्हा परिषद प्राथमिक शाळेच्या वतीने भक्तिमय वातावरणात दिंडी सोहळ्याचे आयोजन करण्यात आले. पावसाच्या सरींमध्येही विद्यार्थ्यांनी टाळ-मृदंगाच्या गजरात आणि विठ्ठल नामाच्या जयघोषात संपूर्ण गावातून दिंडी काढत भक्तीमय वातावरण निर्माण केले.
दिंडीत विद्यार्थ्यांनी संत तुकाराम महाराज, संत ज्ञानेश्वर महाराज, संत मुक्ताबाई, विठ्ठल-रुक्मिणी, वासुदेव आदींची आकर्षक वेशभूषा साकारली होती. त्यांच्या देखण्या सादरीकरणामुळे संपूर्ण गाव भक्तिरसात न्हाऊन निघाले. दिंडीदरम्यान घोड्यांच्या उपस्थितीत पारंपरिक गोल रिंगणाचेही आयोजन करण्यात आले, ज्याने उपस्थित ग्रामस्थ आणि पालकांची मने जिंकली.
दिंडी गावातून मार्गक्रमण करत असताना विविध ठिकाणी ग्रामस्थांनी विद्यार्थ्यांचे उत्साहाने स्वागत केले. विद्यार्थ्यांना पोहे, चहा, नाश्ता, फळे आणि बिस्किटांचे वाटप करण्यात आले. ग्रामस्थांच्या उत्स्फूर्त सहकार्यामुळे दिंडी सोहळ्याला अधिक रंगत आली.
या कार्यक्रमासाठी मुख्याध्यापक महादेव वसंतराव घोळवे, शिक्षिका शैलजा दिनकर गुंड, नीता भुजबळ, सुदर्शन भुजबळ आणि रेखा वाघमारे यांनी विशेष परिश्रम घेतले. शिक्षकांच्या नियोजनामुळे आणि विद्यार्थ्यांच्या उत्स्फूर्त सहभागामुळे कार्यक्रम यशस्वीरीत्या पार पडला.
या दिंडीत विद्यार्थी, पालक, ग्रामस्थ आणि नागरिक मोठ्या संख्येने सहभागी झाले होते. संत परंपरेचा वारसा, संस्कार आणि भक्तीभाव विद्यार्थ्यांपर्यंत पोहोचविणारा हा उपक्रम सर्वांच्या कौतुकाचा विषय ठरला.
