४० हजारांहून अधिक शेतकरी बाधित; ३४ कोटी ८५ लाख रुपयांहून अधिक मदतीची अपेक्षा, चारा पिकांचे क्षेत्र वाढविण्याचे कृषी विभागाचे आवाहन
पुरंदर / प्रतिनिधी :
यंदाच्या खरीप हंगामात पुरंदर तालुक्यातील २३ हजार ६८४ हेक्टर क्षेत्राला दुष्काळाचा फटका बसला असून, हजारो शेतकऱ्यांचे पिकांचे नुकसान झाले आहे. नुकसानीचे पंचनामे पूर्ण करण्यात आले असून, बाधित शेतकऱ्यांना शासनाकडून ३४ कोटी ८५ लाख ५०० रुपयांच्या मदतीची अपेक्षा असल्याची माहिती तालुका कृषी अधिकारी श्रीधर चव्हाण यांनी दिली.
दुष्काळसदृश परिस्थितीच्या पार्श्वभूमीवर शासनाच्या आदेशानुसार महसूल विभाग, पंचायत समिती आणि कृषी विभागाच्या माध्यमातून तालुक्यातील पिकांच्या नुकसानीचे पंचनामे पूर्ण करण्यात आले आहेत. खरीप हंगामात तालुक्यात ३३ हजार २११ हेक्टर क्षेत्रावर पेरणी झाली होती. त्यापैकी २३ हजार ६८४ हेक्टर क्षेत्रावरील पिकांना दुष्काळाचा फटका बसल्याचे पंचनाम्यांतून समोर आले आहे.
जिरायती, बागायती आणि फळपिकांचे नुकसान
तालुक्यातील जिरायती क्षेत्रातील भात, बाजरी, सोयाबीन, भुईमूग आणि वाटाणा या पिकांचे मोठ्या प्रमाणावर नुकसान झाले आहे. एकूण १४ हजार १८६ शेतकऱ्यांच्या ८ हजार १२६ हेक्टर क्षेत्रावरील जिरायती पिके बाधित झाली आहेत.
तसेच २३ हजार ३५६ शेतकऱ्यांच्या १२ हजार ८४१ हेक्टर बागायती क्षेत्रातील ऊस आणि भाजीपाला पिकांचे नुकसान झाले आहे. सीताफळ, डाळिंब, आंबा, पेरू आणि अंजीर यांसारख्या फळपिकांनाही दुष्काळाचा फटका बसला आहे. या फळपिकांचे ५ हजार ५४७ शेतकऱ्यांच्या २ हजार ७१७ हेक्टर क्षेत्राचे नुकसान झाल्याची माहिती देण्यात आली.
राज्य शासनाच्या २०२३ मधील आदेशानुसार नुकसानभरपाईसाठी निधी अपेक्षित असून, पात्र शेतकऱ्यांना मदत मिळण्याबाबत शासनाच्या पुढील निर्णयाकडे लक्ष लागले आहे.
चारा पिकांचे क्षेत्र वाढविण्यासाठी कृषी विभागाचे प्रयत्न
दुष्काळसदृश परिस्थितीत आगामी रब्बी हंगामातील मका आणि चारा पिकांच्या व्यवस्थापनासाठी कृषी विभागाकडून शेतकऱ्यांमध्ये जनजागृती करण्यात येत आहे. ऑनलाइन वेबिनारच्या माध्यमातून पीक व्यवस्थापन, चारा पिकांचे क्षेत्र वाढविणे आणि उत्पादनवाढीसाठी आवश्यक उपाययोजनांची माहिती दिली जात आहे.
कृषी विभागाचे अधिकारी आणि कर्मचारी शेतकऱ्यांपर्यंत पोहोचून चारा पिकांच्या लागवडीसाठी मार्गदर्शन करणार आहेत. दुष्काळाच्या परिस्थितीत जनावरांसाठी चाऱ्याची उपलब्धता कायम राहावी, यासाठी चारा पिकांचे क्षेत्र वाढविण्यावर भर देण्यात येत आहे.
१५ हजार ८६० शेतकऱ्यांना ज्वारी बियाण्यांचे मिनी किट
कृषी विभागाच्या राष्ट्रीय अन्नसुरक्षा व पोषण उपअभियानांतर्गत पौष्टिक तृणधान्य (रब्बी ज्वारी) २०२६-२७ या उपक्रमातून पुणे जिल्ह्यातील १५ हजार ८६० शेतकऱ्यांना ज्वारी बियाण्यांचे मिनी किट देण्यात येणार आहेत. ऑनलाइन अर्जांनुसार निवड झालेल्या शेतकऱ्यांना प्रत्येकी चार किलो ज्वारी बियाणे देण्याचे नियोजन असून, त्यासाठी एकूण ६३४.४० क्विंटल बियाणे उपलब्ध करून देण्यात येणार आहे.
या योजनेचा लाभ घेण्यासाठी शेतकऱ्यांनी शासनाच्या महाडीबीटी पोर्टलवर ऑनलाइन अर्ज करावेत, असे आवाहन कृषी विभागाने केले आहे.
दरम्यान, पुरंदर तालुक्यातील धरणांमधील पाणीसाठा सध्या सरासरी ७० ते ८० टक्क्यांपर्यंत असल्याची माहिती देण्यात आली आहे. दुष्काळाचा सामना करणाऱ्या शेतकऱ्यांना दिलासा देण्यासाठी नुकसानभरपाई, चारा पिकांचे नियोजन आणि बियाणे योजनांची प्रभावी अंमलबजावणी महत्त्वाची ठरणार आहे.
