पेण : रायगड जिल्ह्यातील पेण तालुक्यातील आंबेडकरी चळवळीतील बुलंद आवाज आणि ज्येष्ठ सामाजिक कार्यकर्ते आदरणीय गोविंद शिवा सताणे यांचे मंगळवार, दि. २५ ऑगस्ट २०२६ रोजी अल्पशा आजाराने निधन झाले. त्यांच्या निधनाने गागोदे खुर्द गावातील एक कणखर नेतृत्व, दानशूर व्यक्तिमत्त्व आणि सामाजिक कार्यासाठी सदैव तत्पर असलेला कार्यकर्ता हरपल्याची भावना व्यक्त होत आहे.
गोविंद शिवा सताणे हे गागोदे खुर्द येथील आदर्श ज्येष्ठ नागरिक तसेच पेण तालुक्याची शान म्हणून परिचित होते. सामाजिक कार्यात त्यांनी दिलेल्या योगदानामुळे तालुक्यातील विविध गावांमध्ये त्यांचा मोठा जनसंपर्क होता. प्रत्येकाच्या मदतीला तत्परतेने धावून जाणारे आणि समाजाच्या प्रश्नांसाठी सातत्याने आवाज उठविणारे कार्यकर्ते म्हणून त्यांची ओळख होती.
त्यांच्या निधनाची वार्ता समजताच पेण तालुक्यातील विविध गावांमध्ये दुःखाची लाट पसरली. सामाजिक कार्यकर्ते, नातेवाईक, मित्रपरिवार तसेच गागोदे खुर्द येथील ग्रामस्थांमध्ये हळहळ व्यक्त करण्यात आली. सिद्धार्थ मित्र मंडळ, तरुण मित्र मंडळ आणि रमाई महिला मंडळाच्या पदाधिकारी व सदस्यांनीही त्यांच्या निधनाबद्दल दुःख व्यक्त केले.
६ सप्टेंबर रोजी पुण्यानुमोदन व श्रद्धांजली सभा
गोविंद शिवा सताणे यांच्या पुण्यानुमोदन, शोकसभा व श्रद्धांजली कार्यक्रमाचे आयोजन रविवार, दि. ६ सप्टेंबर २०२६ रोजी सकाळी ११ वाजता त्यांच्या राहत्या घरी, मु. गागोदे खुर्द, पोस्ट वरसई, ता. पेण, जि. रायगड येथे करण्यात आले आहे.
या कार्यक्रमास बौद्धाचार्य, नातेवाईक, सामाजिक कार्यकर्ते, मित्रपरिवार तसेच ग्रामस्थांनी वेळेवर उपस्थित राहावे, असे आवाहन आयु. शिवाजी गोविंद सताणे, दिगंबर गोविंद सताणे, अरुण गोविंद सताणे, सिद्धार्थ मित्र मंडळ/तरुण मित्र मंडळ गागोदे खुर्द, रमाई महिला मंडळ गागोदे खुर्द आणि गागोदे खुर्द ग्रामस्थ यांच्या वतीने करण्यात आले आहे.
आंबेडकरी चळवळीतील समर्पित सामाजिक कार्यकर्ते गोविंद शिवा सताणे यांच्या निधनाने सामाजिक क्षेत्राची मोठी हानी झाली असून, त्यांच्या सामाजिक कार्याच्या आठवणी सदैव स्मरणात राहतील. त्यांच्या पवित्र स्मृतीस भावपूर्ण श्रद्धांजली व विनम्र अभिवादन.
जय भीम! नमो बुद्धाय!
